Pontevedra vibrou este sábado coa emoción do tríatlon grazas á disputa do Campionato de España de Longa Distancia, e apoiando para empuxar a unha das súas veciñas cara ao podio de honra.
Partía Saleta Castro como unha das grandes favoritas á vitoria na casa na categoría feminina, e a pontevedresa non defraudou ás expectativas conseguindo a medalla de prata ante os seus amigos, familiares e afeccionados que seguiron a proba ao longo das súas máis de 6 horas.
A carreira, que estreaba o circuíto no que se competirá no Mundial de 2019, comezou ben cedo, ás 9:00 horas, coa saída da deportistas elite desde a contorna da ponte dos Tirantes. Por diante 3.000 metros de natación nos que dominou Helene Alberdi con algo máis dun minuto sobre as súas inmediatas perseguidoras, a propia Saleta Castro e a catalá Anna Noguera, defensora do título.
Tras a primeira transición foi precisamente Noguera a que tomou o mando ao comezo dos 116 quilómetros de ciclismo para xa non soltalo ata o final. Saleta mantíñase preto en segunda posición, pero co paso dos quilómetros a distancia íase ampliando. Cos postos consolidados na última transición, a deportista catalá non afrouxou o ritmo e confirmou o seu dominio nos 30 quilómetros de carreira a pé chegando a meta cun tempo de 6 horas, 25 minutos e 1 segundos.
Detrás chegaría a figura local, para levar o segundo posto tras 6 horas, 34 minutos e 36 segundos de esforzo, completando o podio Dolça Olle (6:49:00).
GUSTAVO RODRÍGUEZ, VENCEDOR EN CATEGORÍA MASCULINA
Tamén un deportista da provincia, neste caso o tudense Gustavo Rodríguez, foi protagonista da xornada ao proclamarse en Pontevedra campión de España de longa distancia.
Sen Pablo Dapena na liña de saída para defender a súa coroa nacional, centrado na preparación do próximo europeo, Gustavo tirou de autoridade e experiencia para levar o título. Conseguiu saír preto da cabeza tras a natación, e rompeu a carreira no sector ciclista para marchar en solitario e alcanzar preto de 5 minutos de renda.
O deportista de Tui tivo con todo que sufrir no tramo final para conservar a distancia coa aparición de cambras, pero logrou sobrepoñerse para chegar á liña de meta situada no Centro Galego de Tecnificación Deportiva cun tempo de 5 horas, 47 minutos e 47 segundos, con case tres minutos sobre Ander Okamika (5:50:46), sendo o terceiro posto para Pello Osoro (5:54:01).
A xornada completárona os deportistas inscritos nos Grupos de Idade no open de Aquabike para converter as rúas da Boa Vila nunha oda ao tríatlon durante boa parte da xornada.