Prato forte para comezar a segunda volta ligueira. O Pontevedra defende liderado recibindo ao ÿrdenes en Pasarón (domingo, 17:00 horas) con tres importantes puntos en xogo para ambos os dous conxuntos.
Os granates necesitan vencer para manter a mínima diferenza que os separa de Cerceda e Deportivo B, mentres que os de Nacho Pacios intentan non perder camba cos postos altos.
Ademais, para o equipo local un resultado positivo significaría afastar un dos posibles rivais a unha distancia considerable, ademais de gañarlles o parcial, xa que na primeira volta os granates venceron en Vista Alegre (0-1).
O colexiado Javier Pérez Prado (Lugo) será o encargado de dirixir o partido, auxiliado nas bandas por Rubén Folgueira Ríos e José Luis Cabanas Parrado.
Se ben é certo que nos tres últimos partidos o equipo que adestra Nacho tan só logrou sumar dous puntos, froito de senllos empates, tamén o é que se trata dun conxunto incómodo para calquera rival, que conta ademais co aval de tres vitorias lonxe do seu feudo de Vista Alegre, dúas das cales foron conseguidas en campos tan complicados como o do Rápido de Bouzas e Alondras.
Ademais, chegan a Pasarón coa intención de non se descolgar dos postos de play-off, dos que tan só lles separan tres puntos, o que lle converte nun rival a ter moi en conta.
Campillo e Souto son baixa en ambos os dous equipos por sanción federativa. Pero os problemas de Luisito, non se rematan aí. O técnico de Teo vese obrigado a recompoñer unha vez máis a defensa, para a que pode recuperar a Anxo, que volve ao equipo tras cumprir castigo por tarxetas.
Claro que o técnico ten tamén dúbidas noutras posicións, xa que Tubo segue sen alcanzar o seu mellor estado de forma, tras o proceso febril que padecía a comezos de ano, mentres Benja evoluciona ben, pero tampouco está en perfecto estado das súas molestias nos isquiotibiales, ao que se suma a gripe que padecía durante a semana Kevin Presa.
Por todo iso, tras o adestramento realizado na tarde do venres na Xunqueira, tomou a decisión de convocar 18 xogadores, incluíndo na lista a Bruno, a quen se lle tramitou a ficha con urxencia, ademais do dianteiro xuvenil Ramón, que se estrea nunha convocatoria da que cae o tamén xuvenil Iago Martínez, que viaxara a Cerceda.
Os convocados son: Edu, Lloves, Adrián, Anxo, Pablo, Capi, Kevin Presa, Tubo, Pedro García, Pablo Carnero, Mouriño, Jorge, Centrón, Tomás, Jacobo, Benja, Ramón e Bruno. Deles, Luisito debe deixar dous fóra nos instantes previos ao partido.