Loito no Pontevedra Club de Fútbol polo falecemento duns dos seus xogadores históricos, Constantino Rodríguez Roldán.
Coñecido futbolísticamente como Roldán I e irmán doutro futbolista histórico do club granate (Roldán II), faleceu este martes 18 de marzo aos 83 anos de idade.
Pontevedrés de nacemento, Roldán I tivo a honra de ser parte do Hai que Roelo, a época dourada do Pontevedra na máxima categoría.
Xogou en Segunda División tras a primeira campaña da historia granate en Primeira sendo parte do ascenso aquela tempada e disputando as dúas seguintes tempadas en Primeira División (65-66 e 66-67).
Foron un total de 26 encontros co equipo da súa cidade na máxima categoría, e outros 13 máis na Segunda División.
Actuaba de centrocampista, e tras eses dous anos chegou a militar noutros clubs históricos como o Osasuna, Real Racing de Santander ou Cultural Leonesa.
Dáse a circunstancia de que compartiu partidos en Primeira División co seu irmán, Julián Roldán (Roldán II), dianteiro que pertenceu ao Pontevedra nas súas seis tempadas en Primeira División.
Roldán II foi de feito un dos homenaxeados, xunto a Canosa, na recente reunión de ex-xogadores granates.
O último adeus a Constantino Rodríguez Roldán será este mércores 19 a partir das 12.00 horas no salón de actos do Tanatorio Pontevedra de Funeraria San Marcos.