O Pontevedra-Numancia xogarase o 19 de marzo

Pontevedra
29 de xaneiro 2025

O Comité de Competición da Real Federación Española de Fútbol confirmou a data na que se xogará o partido entre Pontevedra e Numancia supendido pola borrasca Herminia

Saída do túnel de vestiarios do estadio de Pasarón
Saída do túnel de vestiarios do estadio de Pasarón / Mónica Patxot

Xa hai data para o partido entre Pontevedra e Numancia.

A xornada foi aprazada pola alerta meteorolóxica activada por mor da borrasca Herminia.

O Comité de Competición da Real Federación Española de Fútbol, tras analizar a proposta enviada previo acordo polos clubs, estableceu de maneira oficial o día no que debe xogarse este importante choque entre primeiro e segundo clasificado do grupo I da Segunda RFEF.

Esta nova data é o mércores 19 de marzo, día de San Xosé pero que este ano será día laborable.

En canto ao horario do choque "deberá ser comunicado por parte do club local cunha antelación mínima de quince días", establece a resolución feita pública por Competición.

Desta forma o partido aprazado disputarase entre as xornadas 27 e 28 do campionato.

Isto supón para o Pontevedra colocalo entre a saída ao campo do Real Avilés (16 de marzo) e o encontro contra o Coruxo en Pasarón (23 de marzo).

Pola súa banda o conxunto soriano recibirá o día 16 ao Laredo no seu estadio e tras visitar Pasarón fará o propio o 23 de marzo contra o Escobedo.