O Poio Pescamar viaxará a Cartaxena para a fase final da Copa da Raíña

Poio
07 de marzo 2025
Actualizado: 12:30

A Real Federación Española de Fútbol deu a coñecer a sede e datas da fase final da Copa da Raíña, á que regresa despois de catro tempadas o Poio Pescamar

Partido entre o Poio Pescamar e o FSF Castro na Seca
Partido entre o Poio Pescamar e o FSF Castro na Seca / Cristina Saiz

O pavillón Wssell de Guimbarda de Cartaxena, en Murcia, será a sede da fase final da Copa da Raíña de Fútbol sala.

Así o deu a coñecer este venres a Real Federación Española de Fútbol (RFEF), confirmando o lugar e as datas nas que se xogará a final a oito do torneo.

Será concretamente do 2 ao 4 de maio, e alí estará catro tempadas despois un Poio Pescamar con ganas de poder levantar por fin o seu primeiro título nacional.

O conxunto conserveiro volve a unha fase final por primeira vez desde que en 2020 rozase o título chegando á gran final.

Para gañar esta oportunidade o equipo adestrado por Luís López-Tulla superou en 1/16 de final o Penya Esplugues e en oitavos desfíxose nun vibrante partido dun duro rival como o Alcorcón.

Ademais do Poio Pescamar competirán en Cartaxena o Ourense Ontime, STV Roldán, FSF Castro Bloques Cando, Gran Canaria FSF Teldeportivo, CD Burela FS, MRB Móstoles FSF e Melilla Torreblanca.

A RFEF confirmou tamén a Cartaxena como sede da fase final da Copa do Rei.

Neste caso disputarase os días 17 e 18 de maio con catro equipos clasificados, como son Illes Balears Palma Futsal, Movistar Inter, Jaén Paraíso Interior e Servigroup Peñíscola.