Felicidade no Poio Pescamar pola boa marcha do seu segundo equipo sénior feminino.
O filial conserveiro asegurou, a unha xornada para o final da competición, o seu ascenso de categoría.
Con 34 puntos e unha única derrota en 15 partidos, o equipo adestrado por Bea Mateos e Ale de Paz certificou a primeira posición de maneira matemática sen saltar á pista.
Tocáballe xornada de descanso, pero a derrota do Marín Futsal B contra o Tenorio aseguroulle o primeiro posto a falta da última data do campionato.
Desta forma o Poio Pescamar B xogará a próxima campaña na Preferente Galega.
Trátase do chanzo previo á Segunda División Nacional e a só dous banzos por tanto do primeiro equipo.
Na última xornada de liga o filial vermello poderá festexar este logro coa súa afección, xa que recibirá o Bueu na Seca este domingo 16 de marzo (16.00 horas).
Unha vez finalizada a liga, o Poio B porá tamén as súas miras na Copa de Primeira Futgal, competición que gañou a pasada tempada.