Mal comezo de ano e final da primeira volta para o Arosa, que caeu este sábado por 2-1 contra o Bergantiños. Unha derrota que deixa un sabor agridoce o conxunto arlequinado o verse excedido por un rival que chegaba con problemas ao partido e que gañou grazas a dous erros defensivos.
Cunha presión alta e evitando que o Bergantiños sentise cómodo saíu o Arosa ao verde das Eiroas, mentres que os locais optaban por balóns en longo buscando a Cano e Escobar, as súas referencias en ataque.
A primeira ocasión arosista chegou no minuto 6 cun disparo de falta directa de Mon que se foi moi desviado da portería de Santi Canedo.
Respondeu o Bergan aos 11 minutos de xogo cunha boa triangulación en área visitante pasando o esférico por ata catro xogadores chegando por último a Brais, que rematou por encima da rede de Manu Táboas. Tamén avisou Pedro Beda na seguinte xogada cunha moi boa acción individual desde tres cuartos de campo, pero o seu disparo deu nun defensor e foise a córner.
As ocasións sucedíanse en ambas as escuadras pero ningún conxunto era capaz de abrir a lata. O que puido facelo foi Luís Nuño, que robou a carteira a Agulló para, despois dunha pequena liorta, sacar un dereitazo que se estrelou no traveseiro. Corría o minuto 16.
Pero o Arosa, a pesar de chegar á área rival con frecuencia, era incapaz de abrir a lata. Luismi sacaba de maneira maxistral un disparo afastado, previo pase de Julio Rey, obrigando a intervención de Canedo, que tivo que esforzarse para voar e enviar a saque de esquina, punto débil para un Bergantiños que se atopaba con dificultades para defender os balóns parados.
Con todo, foron os locais os que se adiantaron cunha xogada iniciada desde campo propio. Tiraron de balón en longo a Carlos López, e este, aproveitando un erro na defensa vilagarciá, chegou case ata liña de fondo e cruzou o balón coa zurda impedindo a chegada de Manu Táboas.
Tentou o Arosa igualar o duelo antes de chegar ao descanso, pero non tivo fortuna, chegándose ao fin da primeira metade co 1-0 no marcador.
O vento e o terreo de xogo íanse convertendo en grandes lastres para os xogadores arlequinados, que tras o paso dos vestiarios seguían sen dar coa tecla para reverter a situación. Mentres, o Bergantiños se replegaba e aguantaba as chegadas dun rival que non estaba cómodo e sufría cada vez que o balón chegaba a Escobar, que poñía en aprietos aos defensores e gozaba da ocasión do 2-0.
Pero dun posible 2-0 pasouse ao empate. Na seguinte xogada, Piay abriu á banda dereita a Luís Nuño. Este centrou á área local e, Alberto Martín, que estaba só, rematou de testa ao interior da portería de Canedo para igualar a contenda no minuto 59.
A alegría non durou máis de 10 minutos ao Arosa, que se atopou de novo co marcador en contra. O autor do gol arlequinado quixo ceder a un defensor, pero equivocouse e deulla a Yelko, que se atopaba ao bordo da área e enviou o balón á rede. Con todo, o colexiado anulou o tanto por previa falta de Alberto Martín en lugar de deixar a lei da vantaxe, creando gran polémica nas Eiroas. Agulló botou a falta á barreira e o esférico saíu rexeitado cara a un xogador local que disparou ao pau. E en este rexeite si que saboreou o tanto Cano, aproveitándose de que os xogadores arosistas se durmiron para facer o 2-1.
Tocaba remar ao contraxeito unha vez máis e cos cambios parecía fácil, xa que o Bergantiños comezaba a acusar o cansazo e custáballe replegar. Tan só dous ou tres pases eran suficientes para que o Arosa xerase perigo, pero os locais souberon aguantar a pegada rival para asinar a primeira vitoria do ano.