Tres puntos para un posible título honorífico. O Pontevedra recibe a un incómodo e perigoso Alondras en Pasarón (domingo, 17:00 horas), co obxectivo de lograr unha nova vitoria que lle afiance no liderado e manteña o excelente refacho de resultados que acumula dende a chegada de Luisito.
O colexiado encargado de dirixir o partido será Fernando Formoso Sánchez (Ferrol), auxiliado nas bandas por José Antonio Rodríguez Dopico e Alberto Cinza Seoane.
Os granates poderían conseguir o título honorífico de campión de inverno en caso de lograr a vitoria e sempre que o Cerceda non venza no seu partido de Vista Alegre fronte ao ÿrdenes, o que deixaría ao conxunto coruñés a unha distancia insalvable no choque entre ambos os dous que pechará a primeira volta ligueira no Roxo.
Será tamén un partido de reencontros. Volven a Pasarón xogadores como Pablo Lede ou Richi que abandonaron a entidade granate a pasada tempada, así como outros que tamén vestiron a camisola, como Carlos Campo e Pablo Berros. No caso contrario, os xogadores deste Pontevedra que pasaron por Cangas son Jacobo e Miguel Centrón, ademais de Fran Fandiño, que terá que ver o partido dende a bancada por lesión.
En canto á traxectoria de granates e vermello e brancos, mentres os de Luisito están en liña ascendente, o conxunto que dirixe Josiño Abalde entrou nunha dinámica negativa que lle levou nas últimas sete xornadas dende a segunda praza ata a décimo primeira.
Non obstante, os locais non se fían, conscientes de que os de Cangas teñen un plantel de xogadores con calidade e experiencia para facer fronte a calquera rival. De feito, Luisito fartouse de sinalar durante a semana ao Alondras como un dos equipos que considera favoritos para loitar polos postos de play-off.
Ademais, os visitantes, que sufriron cinco importantes baixas na xornada anterior fronte ao Cerceda, recuperan á práctica totalidade de efectivos para este domingo, coa única excepción de Andrés, que parece será a importante ausencia no cadro vermello e branco.
Polo que respecta ao Pontevedra, á baixo xa coñecida de Fran Fandiño e a ausencia por acumulación de amoestacións de Pablo, súmase a dúbida do estado anímico co que chega ao partido da súa despedida David Feito, tras anunciarse a súa baixa. Pola contra, Luisito recupera a Capi, o que fai que tan só teña que realizar un descarte na convocatoria, aínda que esperará para facelo momentos antes do partido, convocando os 17 xogadores dispoñibles.
Así, tras o último adestramento realizado na tarde deste venres en Pasarón, o técnico deu a lista de xogadores cos que contará para buscar unha nova vitoria, sendo a formada por: Edu, Lloves, Adrián, Campillo, Capi, David Feito, Anxo, Pedro García, Kevin Presa, Tubo, Jacobo, Tomás, Mouriño, Centrón, Benja, Pablo Carnero e Jorge.