Victoria sen brillo e con apuros finais para os granates. O Pontevedra comezou ben, superando claramente o Xuventú Sanxenxo na primeira media hora e perdoando ocasións claras para obter maior renda, pero realizou unha frouxa segunda metade, superado e dominado territorialmente polo conxunto local, ata rematar encerrado na súa propia área e pedindo a hora.
Cos papeis repartidos dende a saída de vestiarios, o Pontevedra comezou mandando e encerrando o Sanxenxo na súa área. As chegadas granates eran constantes, mentres o cadro local fiaba a súa sorte á posibilidade dunha saída rápida á contra.
Avisou o once de Luisito nun remate de Campillo, de cabeza, a centro de Tubo, que marchou arriba. A resposta do conxunto amarelo chegou nun balón que non puido aproveitar Nel, ante a indecisión de Edu, que quedou baixo paus. Foi dos poucos sustos que houbo de pasar a defensa granate, á que só a calidade de Rubén e Nel poñía en relativos apuros.
O dominio e superioridade visitante tivo pronto reflexo no marcador. Tubo encontrou unha autoestrada pola súa banda, na que o seu excompañeiro Emilio era superado unha e outra vez. Pero a pesar dese dominio, o primeiro gol chegaría nunha contra, tras un lanzamento de falta botada polos locais. Tubo recibiu, gañou a liña de fondo e puxo un gran balón ao segundo pau que Pablo Carnero rematou de forma precisa, cunha gran volea coa esquerda, cando apenas se cumprira o cuarto de hora de xogo.
Logo empezarían a chover as oportunidades. Na súa gran maioría saídas das botas de Jacobo. Mouriño, Álvaro Muñiz, Pablo Carnero e Jacobo puideron facer o segundo antes de chegar á media hora. Faltou puntaría, especialmente nun gran disparo cruzado de Pablo Carnero, que marchou a escasos centímetros do poste.
Perdoara o Pontevedra, baixando ademais a intensidade do seu xogo, e case lle sae caro. O Sanxenxo encontrou o que buscaba no minuto 40 cando Nel dá un gran pase ás costas dos centrais granates que deixa só a Ramón. O dianteiro plántase só ante Edu, pero o meta consegue tapar o remate, mandando a pelota a corner.
A segunda parte comezou con máis igualdade en canto á posesión e o dominio. Bruno substituíu a Campillo, lesionado, no centro da defensa visitante, e o Pontevedra volveu perdoar nun gran centro de Jacobo, minuto 50, que puxo o balón na cabeza de Pablo Carnero. Con toda a portaría á súa disposición, o dianteiro granate estrelou o remate nas pernas de Vila.
Sería Mouriño o seguinte en buscar a portaría, rematando cruzado un centro de Adrián. Luisito pasara a Jacobo á banda para darlle máis protagonismo a Mouriño por detrás de Pablo Carnero. A solución non foi tal. O Pontevedra, que tivera en Jacobo o home que iniciaba a maioría de xogadas de perigo, perdeu o seu mando e o partido se abriu.
Certo que o Sanxenxo non chegaba con claridade, pero polo menos conseguiu impedir que o Pontevedra o fixese. Luisito deu entrada a Anxo, primeiro, e pouco despois a Jorge, buscando o gol da tranquilidade. Os granates xogaban con lume, cedendo metros a un Sanxenxo valente pero sen chegada.
Dúas accións de Ramón poñerían un nó na garganta dos afeccionados visitantes. A primeira non encontrou rematador ao seu centro dende a liña de fondo, e a segunda (minuto 86), marchou fóra en boa posición, aínda que con pouco ángulo. A resposta do Pontevedra chegou de novo ao contragolpe. Púxoa Jorge, pero Anxo, dende o punto de penalti, mandou o balón ás nubes.
Non marcou o Pontevedra e case o fai o Sanxenxo a continuación. Edu evitou que o remate de Diego González rematase no fondo da rede, dando a vitoria a un Pontevedra gris e perdido en toda a segunda parte, que rematou pedindo a hora.
XUVENTÿ SANXENXO (0): Vila (3); Diego Peña (1), Deivi (2), Alfonso (2), Emilio (1); Guille (2), Héctor (2), Pablo Lede (1); Nel (3), Ramón (3) e Rubén (2).
Substitucións: Diego González (1) por Pablo Lede, minuto 62. Jonathan (1) por Héctor, minuto 69. Dani Muradás (s.c.) por Rubén, minuto 75.
PONTEVEDRA CF (1): Edu (3); Adrián (1), Pablo (3), Campillo (1), Lobato (1); Kevin Presa (1); Tubo (2), Jacobo (3), Álvaro Muñiz (1), Mouriño (1); e Pablo Carnero (2).
Substitucións: Bruno (3) por Campillo, minuto 46. Anxo (1) por Tubo, minuto 61. Jorge (s.c.) por Jacobo, minuto 72.
Árbitro: Sergio Espasandín Cores (A Coruña), auxiliado nas bandas por ÿdgar Soto Eiroa e Alejandro Vilariño Hidalgo. Amoestou a Deivi, Ramón e Diego González, polo Xuventú Sanxenxo, e a Campillo, polo Pontevedra.
Goles: (0-1) Minuto 15: Pablo Carnero.
Incidencias: Campo Municipal de Baltar de Arriba (Sanxenxo). Uns 1.200 espectadores, con ampla maioría de afeccionados visitantes.