A pretempada chega ao seu fin e o Pontevedra Club de Fútbol entra de cheo na súa primeira semana de competición, coa xornada inicial de liga no horizonte fronte á Gimnástica de Torrelavega o vindeiro domingo 3 de setembro (19.00 horas) no Estadio Municipal de Pasarón.
A mellor noticia para os granates, que este domingo pecharon a súa preparación goleando o Villalonga en San Pedro (1-4), é a ausencia de lesionados no seu plantel.
Coa recuperación de Javier Hermelo, afectado por un contratempo muscular as últimas semanas pero que xa participou media hora no último duelo de preparación, Yago Iglesias contará con todos os seus homes dispoñibles.
"Xa a preparar o primeiro partido de liga, sobre todo con todos os efectivos ao 100% que é o máis importante neste momento", recoñeceu o técnico tras o partido en Vilalonga.
O último amigable, aínda que se producise ante un equipo de inferior categoría, serviu ademais para afinar a puntería do equipo e coller confianza de cara a gol, que en anteriores citas parecía resistirse.