Paso case definitivo do Poio Pescamar na planificación do equipo que volverá competir un ano máis na máxima categoría nacional.
O club conserveiro anunciou este luns a fichaxe de Anna Escribano, novo talento que procede do Palau barcelonés co que a pasada campaña xogou na Primeira División.
A ala-peche, de 19 anos, incorpórase así a un plantel que mestura mocidade e experiencia a partes iguais baixo a dirección técnica de Raúl Jiménez no banco.
Ademais de Escribano, o Poio Pescamar confirmou tamén a renovación da valisoletana Irene García, que cumprirá así o seu segundo ano defendendo a camiseta vermella.
Con elas dous son 12 as futbolistas confirmadas no primeiro equipo, xunto a Silvia Aguete, Caridad García, Antía Pérez, Carol Agulla, Clara Rodríguez, Miriam Ruiz, Iria Saeta, Andrea Feijóo, Daniella Sousa e Ana Rivera.
Segundo anunciou a entidade da Seca, a pretempoda dará comezo o día 12 de agosto.