O Club Waterpolo Pontevedra logrou unha agónica vitoria na quenda de penaltis fronte ao Málaga, tras un partido que dominou desde o inicio pero que se complicou no último cuarto.
As pontevedresas, que chegaron a ter unha vantaxe de seis goles, viron como o Málaga empataba a 24 segundos do final, forzando os penaltis.
O partido comezou cun Waterpolo Pontevedra moi sólido, que logrou un parcial de 5-2 no primeiro cuarto.
No segundo, o Málaga aguantou o ritmo local e chegou a empatar a 5, pero as pontevedresas reaccionaron para irse ao descanso cunha vantaxe mínima (6-5).
Despois do intermedio o guion cambiou por completo. As pontevedresas fixéronse co dominio e chegaron mesmo a porse cunha renda máxima de seis goles.
Con todo, o Málaga reaccionou no último cuarto, impondo o seu xogo e logrando un parcial de 3-7 que lles permitiu empatar o partido a 24 segundos do final e forzar a lotaría dos penaltis, onde o Waterpolo Pontevedra mostrouse máis efectivo para facerse co triunfo por 17-15
Con esta vitoria, o CW Pontevedra mantense na quinta posición da táboa, a só dous puntos do líder e a cinco da zona de descenso.
Cabe destacar o debut de Carlota González, xogadora infantil da canteira, que entrou na convocatoria do primeiro equipo.
Ao finalizar o encontro, celebrouse un acto de homenaxe ás deportistas con motivo do Día Internacional da Muller, coa presenza do alcalde de Pontevedra, Miguel Anxo Fernández Lores, a concelleira de Deportes, Anabel Gulías, e o presidente da FEGAN, Juan Carlos Brion.
VITORIA DO EQUIPO MASCULINO EN XEREZ
O equipo masculino do Club Waterpolo Pontevedra debutou este sábado na fase de ascenso a Segunda División Nacional Masculina con triunfo en Xerez fronte ao CW Chiclana.
Os pontevedreses impuxéronse por un contundente 5-9 tras reaccionar despois do descanso.