Miki, renovado e cedido ao Rápido de Bouzas

Pontevedra
01 de febreiro 2016

As últimas horas do mercado de fichaxes depararon no Pontevedra a baixa de Miki, que buscará como cedido no Rápido de Bouzas os minutos cos que non estaba a contar na súa primeira campaña no club granate

Miki durante un adestramento do Pontevedra en Príncipe Felipe
Miki durante un adestramento do Pontevedra en Príncipe Felipe / Mónica Patxot

As últimas horas do mercado de fichaxes, que se pechaba oficialmente este luns ás 18:00 horas en Segunda B e Terceira División, depararon un último movemento no Pontevedra Club de Fútbol.

O club granate confirmou a cesión de Miguel Vilar 'Miki' ao Rápido de Bouzas ata final de tempada.

Fíxoo tras renovar ao futbolista de 19 anos, que asinara o pasado verán por un ano procedente precisamente do equipo vigués.

Miki buscará así sumar en Terceira División uns minutos que na súa primeira campaña en Pasarón estábanselle negando, coa intención de gañarse a confianza de Luisito e volvelo a tentar a próxima tempada.

No capítulo de incorporacións non se produciron sorpresas de última hora e ventá de fichaxes pecha para o Pontevedra con tres altas, as de Company, Bello e Hugo Rodríguez e outras tantas baixas, as de Miki, Tubo e Lloves.