Situación canto menos curios na designación arbitral do próximo partido do Pontevedra Club de Fútbol, e non é a primeira vez que pasa nas últimas tempadas.
O Comité Técnico de Árbitros (CTA) designou para o Bergantiños-Pontevedra o madrileño Ignacio Bordons Romero, que estará auxiliado nas bandas por Javier Blanco Martín e Abraham Belloso Rivero.
Até aí pode parecer unha decisión rutineira, pero é que se trata do mesmo colexiado que dirixiu o partido da primeira volta en Pasarón entre os mesmos equipos.
Aquel encontro, que finalizou con 1-0 en favor dos granates, deixou tamén un incidente extradeportivo que foi recollido por Bordons Romero. Foi o lanzamento dunha botella de auga durante a celebración do gol conseguido por Javi Fontán.
Unha circunstancia que desembocou nunha multa á entidade granate por unha "alteración da orde do encontro de carácter leve".
Naquel encontro en cuestión o árbitro mostrou até seis cartolinas amarelas, tres por cada equipo.
Hai ademais outro precedente no Pontevedra con este colexiado, saldado tamén con triunfo en Pasarón por 3-0 fronte ao Oviedo Vetusta na campaña 23-24.
No que respecta ao Bergantiños, pola súa banda o único precedente é o duelo desta mesma tempada en Pontevedra.