Os irmáns Chamosa fan historia en Marín cun ouro e unha prata no Nacional de marcha

Os irmáns Antía e Dani Chamosa fixeron historia no Campionato de España Absoluto de Marcha en Ruta celebrado este domingo en Marín.

Os atletas pontevedreses conquitaron o ouro e a prata, respectivamente, na distancia de 35 quilómetros.

Ademais bateron as marcas galegas da especialidade.

Antía Chamosa, unha das grandes favoritas, coroouse como flamante campioa de España ao superar en máis dun minuto á súa inmediata perseguidora.

A atleta da Sociedad Gimnástica cruzou a liña de meta nun tempo de 2:44.50, seguida da internacional Laura García-Caro (2:46.00), diploma olímpico nos últimos Xogos, e de Raquel González (2:46.00), subcampioa europea de 35 quilómetros en 2022.

O seu tempo supón unha nova marca galega, a cuarta mellor marca española da historia e a mínima para o Campionato do Mundo.

Pola súa banda, Dani Chamosa conseguiu a medalla de prata cun tempo de 2:29.18, tamén marca galega e cuarta mellor marca española da historia.

O pontevedrés só foi superado polo olímpico e campión mundial Miguel Ángel López (2:27.55), completando o podio o internacional Álvaro López Núñez (2:30.56).