Unha gran praza pública cubrirá o futuro pavillón para tenis de mesa en Monte Porreiro

A construción do novo pavillón deportivo de Monte Porreiro, que estará dedicado en exclusiva ao tenis de mesa, cambiará por completo a fisionomía do barrio ao crear a que será a maior praza pública deste ámbito urbano, un espazo duns 5.000 metros cadrados.

O proxecto, deseñado polo estudo de arquitectura Uña + Amandi, propón que esta praza sexa a cuberta deste novo equipamento deportivo que, aproveitando a orografía do propio terreo, ocupará dúas plantas baixo terra.

Esta é a principal característica dunha intervención que, para o alcalde de Pontevedra, Miguel Anxo Fernández Lores, converterá a este pavillón "nun dos mellores de todo o Estado" para a práctica do tenis de mesa, un deporte que á cidade "está a dar moitas alegrías".

Para a súa construción, tras valorar que se puidese aproveitar o pavillón actual, será necesario derrubalo. No seu lugar habilitaranse os accesos tanto á nova praza, que terá conexións peonís coas rúas Reino Unido e Bélxica, como á propia instalación deportiva.

En superficie, ademais de zonas verdes e unha área polideportiva, haberá unha pérgola duns 800 metros cadrados que servirá como área de estancia para resgardarse do sol ou da choiva.

Xa con respecto ao pavillón, na planta -1 situaranse os accesos do público, unha bancada para 320 espectadores sentados e máis de 200 de pé e a área administrativa do complexo.

Na planta -2, pola súa banda, estará a zona deportiva cunha pista de 1.250 metros cadrados, que terá unha altura de 5 metros e capacidade para instalar, para adestramentos ou competición, até 25 mesas de xogo.

Neste nivel estarán ademais os vestiarios, os ximnasios e o almacén, así como a entrada dos deportistas ás instalacións, que poderán acceder a pé ou a través dun ascensor.

O futuro pavillón, xunto coas máis avanzadas tecnoloxías, estará preparado para que consuma a menor enerxía posible. Así, contará con placas fotovoltaicas para fornecer electricidade e un complexo sistema de aerotermia para regular a temperatura.

A este respecto, Graza Amandi, a arquitecta que elaborou o proxecto, explicou que o feito de que o pavillón estea baixo terra xa é unha "medida pasiva" que axudará á eficiencia enerxética do complexo porque "ayuda mucho a mantener una temperatura óptima".

Facer realidade este novo pavillón suporá un investimento de 6,4 millóns de euros, repartidos entre os 4 millóns da propia instalación deportiva e os 2,4 millóns necesarios para acondicionar a praza pública situada ao nivel da rúa.

Para afrontar este proxecto, o goberno municipal ha solicitado fondos europeos no marco da estratexia de desenvolvemento integrado local (EDIL), que podería financiar até o 60% do seu custo. O 40% restante está previsto que sexa financiado polo Concello e a Xunta de Galicia.

Fernández Lores explicou que a idea é que o Centro Galego de Tecnificación Deportiva (CGTD) poida usar este pavillón para os seus propios deportistas, en horario de mañá e tarde, deixándoo libre para os adestramentos dos clubs locais.

O Concello prevé que este proxecto saia a licitación en maio e as obras poidan adxudicarse en outubro deste ano. A partir de aí, a empresa responsable de construír o pavillón terá un período máximo de dous anos para executalo.