Máis que un partido foi unha guerra, e o Pontevedra Club de Fútbol saíu vitorioso do Estadio Municipal de Pasarón ao vencer o Numancia cun solitario gol de Dalisson e nun alarde de garra e entrega, no duelo directo entre aspirantes que foi aprazado no seu día pola alerta meteorolóxica.
Os granates chegaba en vantaxe na táboa, e marchan como líderes destacados para dar un auténtico golpe á liga.
Estaban en xogo moito máis que tres puntos, e sabíano todos en Pasarón. Desde unha bancada que presentou, salvando a Copa do Rei, a mellor entrada da tempada de longo, até os 22 futbolistas que estaban sobre o céspede.
No bando granate regresaba á titularidade, xusto dous meses despois, Dalisson, e o seu sóla presenza metía o medo no corpo nun Numancia que, tal e como previra Yago Iglesias na previa, non ía renunciar ao seu estilo. Así, o equipo visitante esperaba en campo propio e tentaba saír en velocidade cando roubaba o coiro, mentres o Pontevedra dominaba a posesión e tentaba non acelerarse en exceso.
A defensa numantina marcaba de cerca ao 18 pontevedrés, recorrendo a faltas, e nunha delas, no minuto 12, chegou o primeiro disparo perigoso do propio Dalisson, que Kudakovskiy despexaba con apuros a córner.
Miguel probábao tamén desde a frontal, e o equipo visitante respondía cun contragolpe, nun pelotazo en longo que sorprendeu á zaga e que permitiu a Dani Fernández encarar a Edu Sousa, pero o porteiro local respondeu con firmeza e o dianteiro non logrou aproveitar o rexeite.
Pelábase por cada balón, por cada centímetro, pero máis no campo do Numancia e co Pontevedra merodeando o perigo. Foi así ata que no minuto 24 chegou o 1-0. Pase filtrado de Brais Abelenda ás costas dos centrais para o desmarque dun Dalisson que, en posición dubidosa, plantouse ante o porteiro. O seu primeiro remate marchou á madeira, pero o rexeite volveu ás súas botas e á segunda non perdoou para delirio da bancada e desatando a rabia do xogador, con mensaxe reivindicativa incluído na súa celebración.
O partido crecía en voltaxe por momentos. Reclamábase cada xogada, xa fose unha caída de Chiqui na área ou unha simple falta no centro do campo.
Antes do descanso o conxunto soriano estivo a piques de aproveitar unha xogada embarullada para igualar. Evitouno Héctor sacando o balón case sobre a liña, e chegouse ao ecuador con ese positivo 1-0 para os da Boa Vila.
Dous cambios realizaba o Numancia tras o paso por vestiarios. Xa non lle valía replegarse e tiña que arriscar para buscar, canto menos, o empate.
Tentouno de lonxe Sanchidrián cun potente disparo no minuto 51, respondendo Edu Sousa cunha gran man para desviar o coiro.
A intensidade seguía sendo máxima, e con ela chegaban os cartóns para o Pontevedra en accións divididas de Miguel Cuesta e sobre todo de Héctor, nunha dura entrada, o que obrigaba a Yago Iglesias a mover o banco. Entraba así o capitán Álex González en lugar de Miguel, un dos amoestados, e pouco despois Iago Novo en lugar do lateral zurdo.
Xusto antes Sanchidrián metera o medo no corpo cunha carreira por banda deixando atrás a Pelayo, pero por fortuna ao seu centro raso non chegou Góngora polos pelos.
Co paso dos minutos a tensión acababa por comer o xogo, e o Pontevedra entraba en modo supervivencia para agarrar con uñas e dentes ao resultado. Ao árbitro custáballe tamén manter o control, até chegar a unha perigosa acción sobre Edu cunha aparatosa caída do porteiro por falta dun rival que deixou xeado a todo o estadio. Por sorte quedou nun susto.
Quedaban só dez minutos e Yago retiraba o goleador Dalisson e a Yelko para meter a dous gladiadores máis, Rufo e Rares.
O Pontevedra sobreviviu á guerra na que se converteu o tramo final, bronca incluída na zona dos bancos de suplentes, e a recompensa era enorme, un triunfo que deixa máis cerca que nunca o obxectivo do ascenso, afastando o Numancia a 4 puntos de distancia cando só quedan 21 máis en xogo. Os granates xa o rozan cos dedos.
PONTEVEDRA CF (1): Edu Sousa, Garay, Pelayo, Igor, Héctor (Iago Novo, min.68), Samu Mayo, Yelko (Rares, min.81), Miguel Cuesta (Álex González, min.58), Chiqui, Dalisson (Rufo, min.81), Brais Abalenda.
CD NUMANCIA (0): Kudakovskiy, Bonilla, Danese, De Frutos (Mendibe, min.46), Grande (Gexan, min.73) , Moustapha, Fuentes, Sanchidrián, Dani Fernández (Jony, min.61), Carlos González (Góngora, min.46), Dieste (Alain Ribeiro, min.78).
Árbitro: Mario Pacheco Cotero (Cantabria), auxiliado nas bandas por Javier Correa Díez e Guillermo Martínez González. Amoestou a Miguel Cuesta, Héctor, Rares e Álex González no Pontevedra e a Grande, Dieste, Fuentes e Sanchidrián no Numancia. Expulsou o fisioterapeuta do Pontevedra, Manu Barros, e o visitante Óscar de Frutos no banco no tempo de desconto.
Goles: 1-0 Dalisson (min.24).
Incidencias: Partido aprazado da xornada 20 de liga de Segunda RFEF disputado no Estadio Municipal de Pasarón ante 5.713 espectadores. Gardouse un minuto de silencio polo falecemento de Manolo Barreiro, socio número 2 do Pontevedra CF.
