O Marín Futsal comezou a planificar a que será a súa cuarta tempada consecutiva en Primeira División.
O obxectivo do cadro marinense, tras o sufrimento do último curso logrando salvar a categoría na última xornada de liga, será non pasar tantos apuros para certificar a permanencia e recuperar o nivel dos seus primeiros anos na elite.
Para iso a entidade da Raña confirmou xa as súas primeiras renovacións.
Por unha banda seguirá no equipo a gardameta Patri Arruti, peza importante o último ano tras aterrar en Marín o pasado verán procedente do Alcorcón.
Ademais o Marín Futsal pechou a continuidade da brasileira Gi Portes, futbolista que reforzou ao equipo no mercado de inverno e que terminou resultando determinante para salvar a categoría.