A aventura do Pontevedra na Copa do Rei chegou ao seu fin nos oitavos de final, pero fíxoo cunha nova demostración de decoro e valentía para arrinconar a un equipo de Primeira División como o Getafe, que tivo que recorrer a todas as súas 'artes' para superar a eliminatoria e que terminou pechado na súa propia área.
Cambiou o esquema Yago Iglesias tentando sorprender coa súa formulación a Bordalás, con tres centrais e dándolle toda a banda a Javi Fontán e Héctor Hernández nos costados.
Co que non contaba o técnico local é que na primeiro xogada do encontro o Getafe atopase premio. Álvaro Rodríguez roubáballe a carteira en tres cuartos de campo a Samu Mayo, facíase oco e conectaba un potente disparo coa zurda á base do pau ante o que nada podía facer Manu Vizoso. Non se tiña cumprido o segundo minuto de xogo e o marcador era xa de 0-1.
🎯 Zurdazo y a guardar.
— Fútbol en Movistar Plus+ (@MovistarFutbol) January 15, 2025
Álvaro Rodríguez tiene prisa, @GetafeCF. #LaCopaMolapic.twitter.com/OcYXg394OJ
Acusou o golpe o Pontevedra, nervioso nas seguintes accións e sen lograr mostrar o seu xogo ante a presión dos madrileños. Nestas Arambarri conectou un remate de cabeza a balón parado e Uche puido agrandar a ferida, pero esta vez non estivo acertado o Getafe.
Tardou o Pontevedra 20 minutos en empezar a sentir cómodo coa posesión, gañando metros e presenza aos poucos en campo contrario. Os de Bordalás, contentos co botín, replegaban en campo propio.
Aos poucos, con máis contacto co balón, empezaron a crecer os de Yago Iglesias, ata que pasada a media hora de xogo empezaron por pimera vez a ameazar a meta rival. Primeiro nunha boa chegada de Dalisson pola dereita, con centro e arrastre de Rufo facendo oco á chegada ao segundo pau de Héctor. O seu remate pegaba nun defensor para enviar a córner in extremis. Dous minutos despois Garay habilitaba a Dalisson en profundidade e o 18 granate disparaba obrigando a intervir por primeira vez a Letacek.
A bancada de Pasarón contaxiábase co seu equipo, e entrou en ebulición xusto despois, no minuto 40. Álvaro Rodríguez, autor do gol, soltaba o cóbado sen balón a Mario Gómez, co línier a dous metros da acción. Quintero González non dubidou e mostroulle inmediatamente o cartón vermello. A expulsión cambiaba por completo o panorama, con todo un tempo aínda por diante e con mínima vantaxe visitante no marcador ao descanso.
🟥 A expulsión de Álvaro Rodríguez. #LaCopaMolapic.twitter.com/xvBz7RjI8S
— Fútbol en Movistar Plus+ (MovistarFutbol) January 15, 2025
Yago viu a oportunidade e deu entrada tras o intermedio ao capitán Álex González e a Xabi Domínguez, dous extremos, para recuperar o seu habitual esquema de xogo e apostar por ir ao ataque a polo empate, retirando a Garay e Rufo e situando a Dalisson en punta.
Con esa formulación e un home máis sobre o terreo de xogo, o choque pasou a estar dominado por completo polo Pontevedra, que puido empatar moi pronto cun potente disparo de Xabi Domínguez que topou co traveseiro, e tamén o roldou Mario Goméz cun chute afastado que marchou pegado ao pau.
O ritmo que empezaba a ter o partido non lle gustaba ao equipo de Bordalás, que tentou arrefrialo recorrendo ao 'outro fútbol', con perdas constantes de tempo. O marcador favorecíalle e o colexiado permitíao.
Carles Pérez estivo a pto de embocar un centro ao segundo pau nunha das poucas aproximacións xetafenses, pero respondía Iago Novo cazando un rexeite e conectando un disparo que obrigaba a Letacek a empregarse a fondo para desviar a córner.
Os minutos ían vayendo coa elimintaoria aínda nun puño, permitindo á bancada crer en vivir un novo milagre en Pasarón. Con todo, o encontro foi caendo en intensidade ante as manobras do conxunto visitante, que renunciaba a pasar do seu propio campo.
Chegouse así ao tempo de desconto no que Diego Rico deixaba ao seu equipo con nove ao ver a segunda amarela. Apenas tivo incidencia porque non había espazo para máis.
Derrota, si, pero con orgullo, e así o recoñeceu a bancada de Pasarón despedindo aos seus cunha sonora ovación. Ben o merecían.
PONTEVEDRA CF (0): Manu Vizoso, Javi Fontán, Garay (Xabi Domínguez, min.46), Pelayo, Mario Gómez (Igor Irazu, min.72) , Héctor Hernández (Charly, min.72), Samu Mayo, Yelko Pino, Iago Novo, Dalisson, Rufo (Álex González, min.46).
GETAFE CF (1): Letacek, Berrocal, Luis Milla (Djené, min.85), Arambarri, Diego Rico, Álvaro Rodríguez, Peter (Álex Sola, min.46), Juan Iglesias, Domingos Duarte, Coba (Carles Pérez, min.46), Uche (Borja Mayoral, min.90).
Árbitro: Alejandro Quintero González (Andalucía), auxiliado nas bandas por Granel Peiró e Alonso López, con Jorge Figueroa Vázquez como responsable do VAR. Amoestou a Pelayo e Dalisson no Pontevedrea e a Peter, Coba, Diego Rico, Arambarri e ao adestrador Bordalás no Getafe. Expulsou o visitante Álvaro Rodríguez con vermella directa no minuto 40 e a Diego Rico por dobre amoestación no minuto 91.
Goles: 0-1 Álvaro Rodríguez (min.1).
Incidencias: Partido de oitavos de final da Copa do Rei disputado no Estadio Municipal de Pasarón ante 10.497 espectadores.
