Pendente unicamente de confirmación polo pleno da Real Federación Española de Fútbol, o Pontevedra CF xa ten rivais para a tempada do seu regreso á Segunda División B. A Comisión Mixta, reunida na tarde deste martes, tras un intenso debate e máis dunha protesta, fixo pública a súa proposta de composición dos catro grupos pola cal o Pontevedra e os outros cinco equipos galegos quedarán integrados no Grupo 1, xunto con asturianos, castelán-leoneses, cántabros, rioxanos, navarros e o Cacereño, de Estremadura.
Deste xeito, ese grupo primeiro queda integrado por seis equipos galegos (Pontevedra, Celta B, Coruxo, Somozas, Rácing de Ferrol e Compostela), seis castelán leoneses (Cultural Leonesa, Astorga, Burgos, Arandina, Guijuelo e Real Valladolid B), dous asturianos (Sporting de Gijón B e Lealtad de Villaviciosa), tres navarros (Tudelano, Pena Sport e Izarra), un cántabro (Rácing de Santander), un rioxano (UD Logroñés) e un estremeño (Cacereño).
Trátase dun grupo atractivo, á vez que deportivamente complicado, con equipos históricos como Rácing de Santander, U.D. Logroñés, Rácing de Ferrol, Compostela ou Cultural Leonesa. Ademais do Pontevedra, hai outros tres recén ascendidos como son Peña Sport, Izarra e Arandina, e un descendido de Segunda A, o Rácing de Santander.
A composición do grupo significa na práctica un éxito para os equipos galegos, que conseguiron sacar adiante na súa totalidade a proposta que defendían.
En canto ao resto dos grupos quedan integrados así:
Grupo II: Pais Vasco (Real Unión, Barakaldo, Leioa, Amorebieta, Sestao Ríver, Real Sociedade B, Portugalete, Areas de Getxo e Gernika), Madrid (Real Madrid Castilla, Getafe B, Fuenlabrada e Rayo Majadahonda), Aragón (CD Ebro), Canarias (CD Mensajero) e Castela-A Mancha (Socuéllamos, Toledo, Talavera, La Roda e Guadalajara).
Grupo III: Illas Baleares (Atlético Baleares e Llosetense), Comunidade Valenciana (Alcoyano, Olimpic de Xátiva, Villarreal B, Valencia Mestalla, Eldense, Hércules CF, Huracán Valencia e Atlético Levante) e Cataluña (Reus Deportiu, UE Lleida, Badalona, Hospitalet, Espanyol B, Olot, Cornellá, Barcelona B, Sabadell e Pobla de Mafumet).
Grupo IV: Andalucía (Almería B, Granada B, Linense, Betis B, San Roque de Lepe, Marbella, Real Jaén, Sevilla B, Recreativo de Huelva, Linares, Cádiz e Algeciras), Murcia (Real Murcia, La Hoya Lorca, Cartagena, Jumilla e UCAM Murcia), Melilla (UD Melilla) e Extremadura (Villanovense e Mérida).
Esta proposta da Comisión Mixta debe ser referendada definitivamente o próximo día 15 de xullo. Se ben xa foron varios os equipos que manifestaron a súa oposición a esta, os precedentes de anos anteriores indican que o pleno da RFEF adoita dar a súa aprobación sen realizar cambios.