Colgados do traveseiro e sen apenas pisar a área granate. Ese foi o Bergantiños que, a pesar de todo a piques estivo de levar un punto de Pasarón fronte a un Pontevedra moi superior, que mereceu moito máis que ese triunfo mínimo materializado nunha acción de estratexia culminada por Fontán, despois de malograr oportunidades máis que suficientes para conseguir unha vitoria folgada.
O tres puntos fan que os de Yago Iglesias durman como líderes, á espera do que faga este domingo o Numancia na súa visita ao pechacancelas Gimnástica de Torrelavega.
Pouco tardou o equipo granate en plasmar o seu esmagador dominio territorial na primeira oportunidade de perigo. Fíxoo Chiqui, en condución cara ao interior, para terminar rematando coa esquerda e facer que o balón saíse fóra por moi pouco.
Era o minuto 8 e a ocasión local pareceu espertar os de Carballo, que tentaron sen demasiado éxito subir a súa liña defensiva. Iso si, un par de accións imprudentes custaron as dúas primeiras (e perigosas) amarelas para os da casa, que vían como o seu central, Pelayo, e o seu medio centro, Samu Mayo, eran amoestados en xogadas sen perigo algún.
Avisou de novo Dalisson, pasado o cuarto de hora, tentando sorprender a un Santi Canedo que deixara libre a portaría, pero non acertou na dirección do remate.
O Bergantiños xogaba a súa sorte ao acerto defensivo (ou desacerto rematador local) e á posibilidade dun erro rival que lle permitise unha contra letal, cunha presenza case testemuñal en terreo granate.
Novo aviso granate aos 25 minutos. O pase da morte que serviu Álex González non chegou Rufo a empuxalo por moi pouco.
Durante uns 10 minutos pareceu que o Bergantiños lograba neutralizar a proposta local e daba un paso á fronte, pero foi un espellismo e así foi Álex González quen buscou abrir o marcador, pasada a media hora. O seu disparo raso desde o bordo da área puxo a proba a Santi Canedo, que conseguiu desviar a córner.
Ao fío do descanso, minuto 43, tivo o Pontevedra a mellor ocasión. Un centro de Chiqui, desde a dereita, remátao de cabeza Álex González. Santi Canedo voou directamente até a escuadra para de novo negar o tanto aos granates e mandar outra vez o balón á esquina.
A pesar de empate inicial, cando o árbitro mandou os xogadores ao vestiario, dando por finalizada a primeira parte, non parecía haber motivos de preocupación, nin sequera a pesar de que, unha vez máis, aos de Yago Iglesias custáballes converter en goles o seu mellor xogo e dominio sobre o rival.
Os comezos da segunda metade foron unha continuidade do visto até o momento. De novo Santi Canedo apareceu para negar o gol a Samu Mayo (minuto 53) e logo rexeitar un remate envelenado de Dalisson, que Álex González empuxou á rede, pero o árbitro invalidou a acción a instancias do seu asistente, quen sinalou fóra de xogo do capitán granate.
Tívoa o Bergantiños nunha contra, que era o que viña buscando. O balón chegoulle a Antañón, que rematou mordido e desviado (minuto 57).
Cos de Carballo aplicados a unha defensa numantina en apenas 20 metros por diante da súa área, o Pontevedra seguía tentando buscar ocos para facer saltar o ferrollo, pero os minutos pasaban, as ocasións chegaban con contagotas agora, cando a paciencia debía converterse en aliado fundamental.
Un centro de Héctor acabou no traveseiro, tras o remate de cabeza de Dalisson e ante o exceso de vista e confianza de Santi Canedo.
Tanto esforzo e paciencia atopou recompensa cando o partido enfilaba a súa recta final. Foi mercé a un lanzamento de esquina que chegou a Fontán, absolutamente desmarcado, que non dubidou e rematou co pé para facer xustiza ao único equipo que quixo e buscou a vitoria desde o inicio.
Sen capacidade de reacción, o Bergantiños vía como se lle escapaba un partido que nunca estivo ao seu alcance, pola súa falta de ambición ofensiva.
Puido redondear Dalisson no desconto, nunha excelente xogada de Xabi, pero non logrou empalmar co acerto que afai.
PONTEVEDRA C.F. (1): Edu; Garay, Pelayo (Fontán, minuto 73), Mario Gómez, Héctor Hernández (Xabi, minuto 77); Samu Mayo (Cambil, minuto 73), Yelko Pino; Chiqui (Charly, minuto 77), Dalisson, Álex González; e Rufo (Iago Novo, minuto 63).
BERGANTIÑOS F.C. (0): Santi Canedo; Bastos (Currás, minuto 81), Fito (Álex Ramos, minuto 63), Cristian Moreno, Tiján; Molina (Iago Martínez, minuto 63), Uzal; Antañón, Marcos Remeseiro (David Álvarez, minuto 73), Omar; e Pachón (Musy, minuto 73).
Árbitro: Ignacio Bordóns Romeu (Colexio madrileño), auxiliado nas bandas por Javier Blanco Martín e Abraham Belloso Rivero. Amoestou a Pelayo, Samu Maio e Yelko Piñeiro, no Pontevedra, e a Bastos, Cristian Moreno e Musy, no Bergantiños.
Goles: (1-0) Minuto 79: Fontán.
Incidencias: Partido da xornada 12 de liga en Segunda RFEF, disputado no Campo Municipal de Pasarón (Pontevedra). 2.395 espectadores.
