deportes

Festín goleador do Pontevedra á conta do Langreo (6-0)

Pontevedra
17 de setembro 2023
Almu Dapena

Á terceira foi a vencida para o Pontevedra CF, que debía gañar para conseguir boas sensacións e emprender ao fin o seu camiño cara ao obxectivo do ascenso. A aposta era sinxela: materializar as ocasións e non ceder en defensa. Foi fácil. Os de Yago Iglesias dominaron o encontro, realizaron unha boa presión tras perda e golearon para conseguir o primeiros tres puntos da tempada

Partido entre Pontevedra - Langreo en Pasarón
Partido entre Pontevedra - Langreo en Pasarón / David Rodiño

Á terceira foi a vencida para o Pontevedra CF, que debía gañar para conseguir boas sensacións e emprender ao fin o seu camiño cara ao obxectivo do ascenso. 

A aposta era sinxela: materializar as ocasións e non ceder en defensa. Foi fácil. Os de Yago Iglesias dominaron o encontro, realizaron unha boa presión tras perda e golearon para conseguir o primeiros tres puntos da tempada.

Nin dous minutos tardou o Pontevedra en dar o primeiro golpe. Bastos cedeu a Garay, que desde a frontal enganchou un derechazo na escuadra da portería de Adrián Torre, que chegou a tocala pero nada puido facer para evitar que entrase.

Tentou tomar as rendas o Langreo, pero eran os granates os que dominaban e gozaban dunha nova ocasión. Samu enviou en longo a Bastos, este centrou a Charly, pero o seu disparo rexeitouno a zaga rival.

Replicó o cadro asturiano na seguinte xogada na que foi a súa mellor chegada, pero o Pontevedra defendeu ben e quedou en nada.

Dominaba o Pontevedra por completo e facía o que quería pola banda dereita, con Bastos e Charly sendo un pesadelo para Dani Hernández, incapaz de frear cada internada local.

E así chegou a seguinte xogada de perigo dos de Yago Iglesias. Boa combinación desde banda dereita e envío a Álex González, que apareceu na esquina da área para sacar un bo disparo que se foi por arriba.

Seguiu creando perigo o Pontevedra. Rufo tentouno desde a interior da área, pero rematou moi frouxo e foise rozando o poste. E aos 35 de xogo, o ariete atopou o premio que tantos partidos levaba buscando. Churre roubou tras perda, balón en longo a Dalisson á esquerda e este a Yelko, que desde a liña de fondo sacou un centro medido á cabeza do 9 para que anotase o 2-0.

Tras o paso polos vestiarios tentou dar un paso adiante o Langreo, pero seguían sendo os granates os que tiñan o partido controlado e gozaban dunha nova oportunidade no minuto 53. Os visitantes tentaron recuperar, pero Samu Mayo tirouse ao chan, viu ao porteiro adiantado e buscou batelo por arriba, pero o coiro foise fóra por moi pouco. 

E a renda incrementouse alcanzada case a hora de xogo. Yelko abriu á esquerda a Dalisson e pase da morte a Rufo. O madrileño recibiu no punto de penalti de costas á portería, virouse e bateu a Adrián Torre.

Pero a goleada non quedara aí e Rufo aínda quería máis. Bastos centrou desde a dereita, Jaichenco, de cabeza, deixou o balón morto no punto de penalti e o 9 enganchou unha volea coa zurda para aloxar o esférico na rede e facer o 4-0.

Yelko non quería faltar á súa cita co gol e conseguiuno a falta de dez minutos para a conclusión cun auténtico golazo desde a frontal, previo pase de Jaichenco.

Parecía que xa estaba sentenciado o encontro, pero aínda quedaba a estrea goleadora de Javi Hermelo. Padín sacou de esquina e o 3 lanzouse en ferro para cabecear á rede o sexto e definitivo gol.

PONTEVEDRA CF (6): Edu Sousa, Bastos (Javi Hermelo, min. 79), Churre, Mario Gómez, Álex González (Hugo Padín, min. 79), Rufo, Yelko (Toño, min. 79), Samu Mayo, Dalisson (Jaichenco, min. 72), Benjamín Garay e Charly (Víctor Casáis, min. 72).

UP LANGREO (0): Adrián Torre, Nacho López (Sergio Ordóñez, min. 79), Dani Hernández (Steven, min. 65), Gonzalo de la Fuente, Carlos Cid, Ángel Sánchez (Gabriel Rabanillo, min. 65), Juan López, Luís Sánchez, Iago Novo (Joselu Guerra, min. 79), Nané e Keko Hevia.

Goles: 1-0, min. 2, Garay. 2-0, min. 35, Rufo. 3-0, min. 57, Rufo. 4-0, Rufo, min. 73. 5-0, Yelko, min. 77. 6-0, Javi Hermelo, min. 88.

Incidencias: Partido entre Pontevedra CF e UP Langreo correspondente á xornada 3 de Segunda RFEF disputado no Estadio Municipal de Pasarón #ante 1526 espectadores.

Máis novidades