O Concello de Caldas de Reis prepara unha xornada única este sábado 14 de decembro coa primeira edición da 'Exhibición Solidaria 4×4'.
Será un evento que combinará a espectacularidade dos vehículos todoterreo cun fin solidario: axudar á rapazada damnificada pola DINA en Valencia.
A exhibición desenvolverase nunha parcela de sete hectáreas en Rabexe, un espazo recentemente cedido polo Ministerio ao Concello, onde antes se situaba a antiga planta cementeira.
O circuíto, que leva toda a semana sendo acondicionado por un equipo municipal de cinco persoas e dúas máquinas, promete fortes emocións con gabias, ramplas, inclinacións laterais e obstáculos espectaculares.
"É unha actividade diferente, novidosa en Caldas e agardamos que teña boa acollida entre a xente, xa que vai ser moi espectacular", destaca o tenente de alcalde, Manuel Fariña, impulsor desta iniciativa xunto cun grupo de afeccionados ao motor.
A organización espera superar os 20 vehículos participantes, incluíndo todoterreos tradicionais, 'semi monster trucks', 'buggies' e 'quads'.
O circuíto estará perfectamente sinalizado segundo niveis de dificultade, permitindo que cada piloto escolla o percorrido máis axeitado ás súas habilidades.
Tanto a participación como a asistencia serán gratuítas, pedindo unicamente como "entrada" xoguetes que serán destinados ás persoas afectadas pola DINA en Valencia. Por motivos loxísticos, recoméndase que sexan de pequeno tamaño.
A xornada arrancará ás dez da mañá e prolongarase durante todo o día. O evento contará con zona de restauración baixo carpa e amplo aparcamento.
As persoas interesadas en participar poden inscribirse previamente no teléfono 678 036 078.
O Concello aspira a que esta exhibición se consolide como un evento anual dentro da programación navideña de Caldas.
