Ata Corea do Sur desprazouse Ekaterina Rebón para participar no Campionato do Mundo Júnior de Taekwondo, un dos seus grandes retos para esta tempada.
A deportista caldense do Club Número Phi non tivo con todo fortuna e despediuse do torneo por detalles na segunda rolda da competición.
Rebón competiu na localidade coreana de Chuncheon na categoría de -59 quilos, vencendo no seu primeiro combate en tres asaltos fronte á alemá Aish Bangura.
En segunda rolda esperáballe a kazaka Nuray Kaznabek, nun combate moi duro que se decidiu en favor de Kaznabek nos últimos segundos do segundo asalto.
Ekaterina Rebón non era a única galega en liza. Xunto a ela estaba Noa Romero (Natural Sport de Ribeira), que protagonizou unha gran competición logrando o bronce mundialista na categoría de -52 quilos.