Pechada e merecida ovación do público ao equipo á conclusión do partido. É a mellor definición e xusto recoñecemento ao Pontevedra, que logra estrear a súa cuadrícula de puntos e de goles e o fai ao grande, con nota, fronte a un Tudelano compacto, perigoso, atrevido, pero que sucumbiu ante o excelente xogo despregado polos de Luisito.
Os navarros poderán queixarse da súa falta de acerto no remate, pero o mesmo podería dicir o conxunto local, que na primeira parte puido deixar sentenciado o partido, de ter aproveitado o gran protagonista da tarde, Borjas, un par de ocasións para ampliar a súa conta e a do seu equipo.
Pero se Borjas foi quen acaparou a luz dos focos, polos seus dous goles que rompían a seca granate, inxusto sería non destacar a impresionente actuación de Álex Fernández (das súas botas partiron os pases no inicio das dúas xogadas decisivas), de Edu (providencial en senllos man a man con Eneko e Yanis), ou de Anxo, que dende que ingresou no campo foi unha constante dor de cabeza para o seu marcador, Nandi.
Ben en defensa, ben na construción, ben na presión sobre a saída de balón do adversario, con facilidade para chegar á área rival. Ese foi un Pontevedra que se atreveu cun partido aberto, de ida e volta, fronte a un dos rivais máis capacitados da categoría. Sóuboo ver unha afección que se entregou animando e que gozou dun partido vistoso, con dous goles dos seus e cun rosario de ocasións de ambos os dous contendentes.
O Tudelano non quixo especular co resultado. Asumindo riscos coa súa defensa adiantada, pagouno caro en forma do primeiro gol do partido. Os navarros empezaron levando o peso e encontráronse cun gol de tiraliñas. Álex Fernández puxo un gran pase entre o central e o lateral esquerdo visitante. Jandrín rompeu en velocidade e foi xeneroso poñendo un balón que non desaproveitou Borjas para abrir a conta.
Puido empatar no primeiro aviso visitante Nandi. Mandou o seu remate fóra á saída dun corner. Precisamente ese sería o maior problema dos locais, que sufriron moito nas accións a balón parado ante a superior envergadura dos homes do Tudelano.
Pero se boa foi a xogada do gol, mellor aínda a que puido supoñer o segundo e a tranquilidade anticipada (minuuto 26). Jacobo e Mouriño combinan nunha excelente triangulación, pero o pase deste para Borjas sálvao Pagola rexeitando coas pernas, para que o mesmo Borjas o intente de chilena, saíndo o balón xunto ao poste.
Era a tarde de Borjas, que tivo outra clara aos 40 minutos, pero non soubo aproveitar a saída en falso de Pagola.
Puxo cambiar o signo do partido na última acción antes do descanso. De novo a balón parado. Tras o toque dun xogador na disputa, o balón chega a Nandi que fusila por alto. El árbitro invalida o tanto a instancias do seu asistente por fora de xogo. A dúbida é se o toque foi dun xogador navarro ou dun defensa granate, que era do que se queixaban os visitantes.
Na segunda parte seguiu o ritmo frenético e a constante ida e volta de ambos os dous equipos. Agora o Tudelano, que adiantou liñas, tivo máis chegada, pero encontrouse con Edu, que sostivo o resultado ata que o Pontevedra foi capaz de volver ás posesións longas.
A primeira foi para Eneko (minuto 52). O meta granate salva cos pés. Logo Arkaitz, que non chegou a un bo centro de Valero.
Entrou Anxo por Mouriño, e a banda esquerda de ataque local converteuse nun filón. O de Riveira puxo dous bos centros que non encontraron rematador, pero á terceira foi a vencida e a sentenza. Todo empezou noutro excelente balón de Ález Fernández. Anxo gañou a liña de fondo e puxo o centro que Borjas de primeira mandou á rede.
Yanis puido sementar a inquietude (minuto 83). Edu evitouno no novo man a man e o Pontevedra respirou sumando os seus tres primeiros puntos da tempada nun gran partido.
PONTEVEDRA CF (2): Edu; Adrián (Bruno, minuto 69), Campillo, Capi, Verdú; Kevin Presa, Álex Fernández, Jandrín, Mouriño (Anxo, minuto 64), Jacobo (Queijeiro, minuto 56); e Borjas.
CD TUDELANO (0): Pagola; Nandi, Lalaguna, Jonathan, París; Chema Mato; Eneko (Yanis, minuto 62), Azpilicueta (Fernando Rubio, minuto 56), Valero (Iván Martín, minuto 77), Víctor Bravo; e Arkaitz.
Árbitro: Jerónimo Montes García-Navas (Madrid), auxiliado nas bandas por Álvaro Navarro Redondo e Luis Miguel Romero Serrano. Amoestou a Mouriño e Borjas, polo Pontevedra, e a Azpilicueta e Valero, polo Tudelano.
Goles: (1-0) Minuto 8: Borjas. (2-0) Minuto 77: Borjas.
Incidencias: Estadio Municipal de Pasarón. Unhas 1.800 persoas. Gardouse un minuto de silencio polas vítimas do desgraciado accidente acontecido no Rallye da Coruña.