Jéssica Bouzas terá que esperar aínda un pouco máis para debutar coa Selección Española Absoluta.
A tenista arousá atópase en Málaga para disputar con España a fase final da Billie Jean King Cup, máxima competición internacional por países, pero a alerta vermella por temporal na provincia andaluza cambiou os plans.
Bouzas, que chega á cita tras un gran ano que a consolidou como segunda mellor raqueta nacional ao estar no posto 55 do ranking WTA, tiña todas as papeletas para saltar á pista este mércores para medirse á Polonia liderada por Iga Swiatek, número 2 mundial.
Con todo, a Federación Internacional de Tenis (ITF) decidiu adiar este enfrontamento ao próximo venres 15 de novembro a partir das 10.00 horas.
En xogo estará un posto nos cuartos de final da Billie Jean King Cup.
Na previa do torneo, que ten como sede o Palacio de Deportes José Mª Martín Carpena de Málaga, Jéssica afirmou en rolda de prensa que o seu obxectivo estes días é "disfrutar mucho con el equipo, hacer un buen grupo y entrenar bien. Si puedo, lo daré todo en pista, y si la capitana decide que juegue otra, sé que todas estamos dispuestas a dejarlo todo por el equipo, por representar a nuestro país".
"Creo que tenemos un equipo muy bueno, pero si lo dejamos todo en la pista, aunque perdamos, creo que estará totalmente bien", afirmou.
Jéssica Bouzas é, sobre o papel, a número 2 española nun equipo liderado por Paula Badosa (núm. 12 do mundo) e que completan Nuria Párrizas, Sara Sorribes e Mariña Bassols.