Os éxitos deportivos da pontevedresa Daniela Suárez non se deteñen. A nadadora do Galaico Sincro colgou unha dobre medalla de bronce no campionato de España júnior e absoluto de natación artística que se celebrou en Oviedo.
A participación de Suárez nestes campionatos comezou, xunto coa súa compañeira Antía Riveiro, na rutina de dúo técnico, na que quedaron na quinta praza; e na rutina libre, na que acabaron clasificadas na novena posición.
Foi na rutina de só técnico na que Daniela situouse como a terceira mellor nadadora de España en categoría júnior, posto que repetiu na rutina libre.
Só a superaron as súas compañeiras de selección Isabel Shuang e Rocío Calle, que colgaron o ouro e a prata, respectivamente.
Neste nacional, que se disputou nas piscinas do Parque do Oeste de Oviedo, competiron outros dous deportistas do Galaico Sincro, Laura Arias e Juancho Hernández, que quedaron cuartos na rutina de dúo mixto en categoría absoluta.