O Pontevedra Club de Fútbol viviu este venres unha noite de Reis anticipada.Dalisson, Yelko e Rufo vestíronse dos Magos de Oriente para regalar ilusión a un Pasarón ateigado co pase histórico a oitavos de final da Copa do Rei despois de 53 anos.
Xa tiña avisado na previa Jagoba Arrasate, adestrador do Mallorca, que o seu equipo non se podía permitir ningún descoido no que, para el, era unha partido trampa.
Con todo, non foron os descoidos os que condicionaron ao conxunto bermellón, senón a ambición e ganas de desquite dun conxunto granate que volveu vivir unha noite máxica que lembra á época do 'Hai que Roelo'.
E é que si, a este Pontevedra 'hai que roelo' e non se deixa amedrentar por ningún equipo de Primeira División, saltando ao terreo de xogo coas ideas claras e disposto, como de costume, a facer o seu xogo e levar o control do partido, dominando a un Mallorca que buscaba porta aos 30 segundos cun disparo de Antonio Sánchez que Manu Vizoso atallaba sen problemas.
Até aí foi todo. Os granates fixéronse coa posesión e o conxunto balear optou por esperar en campo propio a oportunidade de saír xogando e chegar rápido a área dun equipo local que replegaba á mesma velocidade e desbarataba calquera opción.
Alcanzouse así o minuto 17 de xogo, instante no que o Pontevedra gozou da ocasión máis clara até o momento. Pelayo enviou en longo a Dalisson, este deulla a Xabi e despois a Yelko, que fixo un cambio de orientación á esquerda desde onde Chiqui sacou un disparo cruzado que se foi rozando o poste.
Tres minutos despois, chegou a tolemia. Xabi roubou o esférico en tres cuartos de campo e deullo a Dalisson, quen viu ao porteiro un pouco adiantado e, sen dubidalo, xutou a portaría, enchufando o balón no interior da rede e desatando o delirio entre a afección.
Sufría o Mallorca e gustábase o Pontevedra, que en lugar de ceder o control ao seu rival, seguía creando perigo con balóns en longo a Xabi e Dalisson e correndo ás costas da defensa visitante.
Pasada a media hora de xogo, o cadro balear deu un paso adiante. Navarro realizou unha maxistral xogada individual ao bordo da área lerezana e envioulle o balón entre liñas a Abdón, quen tentou bater a Manu Vizoso, pero no seu lugar xutou fóra.
Estaba a saír todo como unha seda aos granates, pero chegou o xerro de auga fría en forma lesión. Corría o minuto 36 de xogo e Chiqui, despois dunha acción ofensiva, sentiu molestias musculares e tivo que ser substituído por Álex González.
Alcanzábase a recta final do primeiro acto e o Mallorca quería dar un paso adiante para, polo menos, irse ao descanso cun empate, pero en lugar diso foi o Pontevedra o que volveu avisar. Primeiro cunha falta de Dalisson desde a media lúa e despois cun disparo desde o bordo da área de Yelko, pero ambos se foron fóra.
Co inicio da segunda metade a euforia regresou a Pasarón. Apenas se cumpriron 3 minutos e o balón chegou á banda dereita, Xabi puxo un centro e Yelko apareceu desde atrás para, de primeiras, enchufar o balón na escuadra e asinar un auténtico golazo que subía o 2-0 e permitía soñar aos granates.
A raiz do tanto, o ambiente empezouse a caldear. Os nervios comían aos xogadores do Pontevedra e os bermellones buscaban custe o que custe o gol que os metese de novo no partido. En lugar diso, pasada a hora de xogo chegaron os cambios en ambas as escuadras. O conxunto local deu entrada a Rufo e Garay en lugar de Xabi e Javi Fontán, e o Mallorca realizou unha tripla substitución, entrando Muriqui, Larín e Dani Rodríguez por Abdón, Asano e Valery.
Buscaban así os visitantes un revulsivo pero foi o Pontevedra o que, contra todo prognóstico, volveu golpear. Copete buscou o pase atrás a Leo Román e Rufo interceptou o esférico para facer o 3-0 a portaría baleira.
Pasaban os minutos e os granates xa tiñan pé e medio en oitavos de final. Álex González sacaba un mísil desde o frontal que se ía rozando o traveseiro e mentres, Jagoba Arrasate, buscaba á desesperada que o seu equipo se metese no partido e expuña unha ofensiva con tres dianteiros que Yago Iglesias buscaba neutralizar con cinco defensas.
Pero a pesar dos intentos dos bermellones, o Pontevedra mantívose firme, non se deixou amedrentar e levou o triunfo, logrando así, 53 anos despois, o pase a oitavos de final de Copa do Rei e alargando o soño copeiro dunha afección que nunca deixou de crer neste equipo.
PONTEVEDRA CF (3): Manu Vizoso, Javi Fontán (Garay, min. 66), Mario Gómez, Iago Novo, Yelko (Rares, min. 82), Chiqui (Álex González, min 36), Samu Maio, Xabi Domínguez (Rufo, min. 66), Dalisson, Pelayo e Héctor (Igor, min. 81).
RCD MALLORCA (0): Leo Román, Mateu Jaume, Toni Lato, Mascarell (Chiquinho, min. 74), Copete, Abdón (Muriqui, min. 66), Asano (Larín, min. 66), Valery (Dani Rodríguez, min. 66), Antonio Sánchez (Darder, min 45), Valjent e Navarro.
Árbitro: Alejandro José Hernández Hernández (Canarias), auxiliado nas bandas por José Enrique Naranjo Pérez e Marcos Cerdán Aguilar. Amoestaron a Javi Fontán(53'), Yelko (54') no Pontevedra, e a Dani Rodríguez (77') no Mallorca. Tamén mostraron amarela a Yago Iglesias (24'), adestrador do Pontevedra.
Goles: 1-0 Dalisson (minuto 21). 2-0 Yelko (minuto 48). 3-0 Rufo (minuto 72).
Incidencias: Partido de dezaseisavos de Copa do Rei disputado no Estadio Municipal de Pasarón de Pontevedra ante 10.292 espectadores.
