É unha proba xa consolidada no calendario deportivo de Marín, e este ano tampouco podía fallar á súa cita.
O pavillón da Raña será escenario durante a fin de semana, os días 21, 22 e 23 de marzo, da XV Copa Galicia Internacional de ximnasia trampolín.
Farao convertida este ano no I Memorial Pablo Hinojar, para homenaxear o adestrador pontevedrés e ao legado do que era seleccionador nacional desta especialidade deportiva.
"Era un campionato no que el traballaba moito para que saíse adiante e queremos que sexa un recoñecemento a todo ese traballo", explicou na presentación do evento Belén Ferreira, secretaria da Federación Galega de Ximnasia.
E é que se trata de "unha figura esencial para poñer a ximnasia no punto tan alto no que está", defendeu pola súa banda a alcaldesa de Marín, María Ramallo.
Será ademais unha edición de récord, ao esperarse ao redor de 300 deportistas participantes.
Todo arrincará ás 16.00 horas do venres na Raña.
O sábado pola súa banda as primeiras probas disputaranse a partir das 9.30 horas pola mañá e das 15.30 horas pola tarde, mentres que o domingo a actividade se limintará á xornada de mañá a partir das 9.00 horas.