Este mércores presentáronse os primeiros detalles dos Campionatos Mundiais de Tríatlon que se celebrarán na cidade en 2025 e 2026: o Multideporte e a Gran Final das Series Mundiais.
A reunión supuxo a constitución do comité organizador destes eventos históricos, que converterán a Pontevedra na primeira cidade no planeta en albergar estes dous eventos mundiais de Tríatlon de maneira consecutiva.
O alcalde de Pontevedra, Miguel Anxo Fernández Lores, destacou tras esta primeira reunión o impacto destes eventos tanto a nivel deportivo como económico anunciando que se van bater "todos os récords de participación" sinalando que a cidade está plenamente identificada co tríatlon desde 2008 e iso débese ao traballo conxunto de institucións, persoas voluntarias e cidadanía.
Tamén resaltou o papel clave do Centro Galego de Tecnificación Deportiva (CGTD) como berce de atletas de elite e epicentro organizativo.
José Hidalgo, presidente da Federación Española de Tríatlon, subliñou que Pontevedra se enfrontará ao reto de superar os números do Mundial de Multideporte celebrado en 2019, que até agora non foi superado en participación e impacto.
"O Mundial de 2026 será aínda máis grande, cun 30-40% máis de impacto, incluíndo novos campionatos do mundo como o de remudas mixtas en paratriatlón e as probas júnior", indicou Hidalgo.
O secretario xeral para o Deporte da Xunta de Galicia, José Manuel Lete Lasa, reafirmou o compromiso da Xunta co deporte en Pontevedra e reiterou que se darán os primeiros pasos para converter o CGTD nun centro integrado de tecnificación e alto rendemento.
"Non queremos que os nosos atletas teñan que abandonar Galicia para competir ao máis alto nivel", declarou, mencionando nomes como os de Natalia Castro, Lucas García e Saleta Castro, referentes do tríatlon galego.
Desde a Deputación de Pontevedra, o seu vicepresidente Rafa Domínguez destacaba que estes eventos "transcenden o local, implican a toda a provincia e repercuten positivamente na imaxe e a economía de Pontevedra".
Entre as novidades do programa do Mundial Multideporte 2025 figuran probas como o dúatlon, o acuatlón, media distancia, tríatlon cros, e aquabike coa incorporación do dúatlon cros, que combina carreira e bicicleta de montaña.
En 2026, á Gran Final sumaranse os campionatos do mundo de remudas mixtas en paratriatlón, campionatos do mundo júnior, que tamén son novos, e os campionatos do mundo de grupos de idade en categoría de sprint, consolidando a Pontevedra como un referente global no tríatlon, segundo o comité organizador.
Na próxima reunión definirase o orzamento para estes eventos deportivos. Fernández Lores destacou que estes campionatos volverán pór a Pontevedra e Galicia no mapa internacional grazas ao impacto das retransmisións.
"Estes eventos non serían posibles sen a colaboración de todos", concluíu o alcalde, destacando o esforzo dos máis de 600 voluntarios, incluíndo membros da Brilat, a Escola Naval e a Universidade de Vigo, esenciais para a organización que leva a cabo o servizo municipal de Deportes.
