O equipo feminino do Club Natación Galaico de Pontevedra acadou un histórico ascenso a Primeira División Nacional, segundo confirmou oficialmente a Real Federación Española de Natación (RFEN).
O Galaico convértese así nun dos seis clubs que logra o ansiado ascenso.
O conxunto pontevedrés será o único representante galego na máxima categoría a vindeira tempada.
As nadadoras pontevedresas selaron o seu ascenso tras conseguir un meritorio terceiro posto na XXX Copa de Clubs de Natación de Segunda División, sumando 2.013,50 puntos.
O podio completárono o CN Mataró e o CN Granollers, que ocuparon as dúas primeiras posicións.
Tras coñecerse o ascenso, o club quixo agradecer publicamente a través das súas redes sociais o apoio "imprescindible" de todos os seus patrocinadores privados e colaboradores, sinalando que este logro sería "imposible sen vós".
O CN Galaico, fundado en 1994, continúa así escribindo páxinas douradas na súa traxectoria.
O club, que comezou con apenas 30 nadadores baixo o nome de Club Natación Budo Pontevedra, medrou ata converterse nunha referencia da natación galega, sendo nomeado en catro ocasións "mellor club galego de natación" pola Xunta de Galicia.
Esta pasada fin de semana, as integrantes do conxunto pontevedrés acadaban dous récords no Campionato Galego de Natación Absoluto celebrado en Santiago de Compostela.