Cisne e Teucro, "moi contentos" coa decisión da Federación de suspender a liga con ascensos e sen descensos

Despois de varias semanas de incerteza no balonmán español, a Federación Española tomou unha decisión. Tras consultar a clubs, árbitros, adestradores, xogadores e xogadoras e ao Consello Superior de Deportes, xa se decidiu e enviou a súa proposta á Comisión Delegada.

A súa intención é dar por finalizadas as ligas regulares sen que se produzan descensos de categoría pero si ascensos, afectando a Teucro e Cisne respectivamente.

Desde o club branco están "encantadísimos" con esta decisión, e considérana a máis "justa", explica o seu presidente, Santi Picallo.

O Cisne conta cun 80% de vitorias en División Honra Prata, por iso Picallo cre "que se tomó una decisión salomónica atendiendo a las circunstancias de cada competición". Así mesmo, agradece a Asobal "su generosidad por ampliar el número de equipos para la temporada que viene".

Pola súa banda, no Teucro están "muy contentos". "Dar por finalizada la temporada era lo que pedíamos desde hace un mes", explica José Ameijeiras, membro da xunta xestora do club. Por iso cre que "la suspensión de la temporada es la mejor decisión".

Nestes momentos, só queda que a Comisión Delegada dea o visto e prace ao proxecto da Federación e comece a planear a tempada que vén establecendo as prazas de ascenso de cada categoría e, en caso de aprobarse, o Cisne militaría en Liga Asobal e o Teucro en División Honra Prata.