Chega o momento da verdade para o Waterpolo Pontevedra na Primeira División Feminina.
O equipo pontevedrés, no seu terceiro ano en categoría nacional, quere manterse no segundo chanzo do waterpolo español, pero para iso deberá superar a fase pola permanencia que se inicia este próximo sábado 1 de marzo.
Será unha liga de só oito xornadas, na que contan os puntos conseguidos na primeira fase contra rivais directos, cun punto de partida no que o Waterpolo Pontevedra non saíu especialmente mal parado.
Antes de arrincar os cataláns de AE Santa Eulalia e CN Montjuic contan xa con 12 puntos, mentres que o Pontevedra transita no centro da táboa con 9.
O obxectivo será escapar dos dous últimos postos, cos que perdería a categoría, e que agora ocupan Colexio Brains e CD Waterpolo Málaga, con 7 e 3 puntos respectivamente.
No club da Boa Vila existe confianza en poder lograr a salvación, pero haberá que demostralo na piscina empezando cun partido a domicilio contra o CN Ciudad de Alcorcón.
O primeiro partido na casa, na piscina de Rías do Sur, desta segunda fase será o que lles enfrontará ao CD Waterpolo Málaga o sábado 8 de marzo (18.00 horas).
A fase pola permanencia en Primeira División prolongarase ata o sábado 3 de maio, cun último encontro como visitantes fronte ao CN Montjuic.