Punto e final á primeira edición do M15 Pontevedra International Open de Tenis.
O torneo profesional masculino organizado polo Club de Tenis Pontevedra chegou este domingo a súa fin coa disputa da final individual entre o australiano Matthew Dellavedova e o ruso Yaroslav Demin.
Tras unha semana marcada pola choiva, o sol permitiu que o partido polo título se xogara nas pistas exteriores de resina.
O vencedor do duelo decisivo foi o experimentado Dellavedova, impondo o seu xogo desde o fondo da pista fronte ao seu xoven rival para levar a primeira manga por 6-3.
Demin reaccionou cun gran segundo parcial que decantou ao seu favor (1-6), pero Matthew Dellavedova devolveu o golpe no terceiro e decisivo set (6-1) para inscribir o seu nome como o primeiro que levanta o torneo pontevedrés.
Yaroslav Demin foi tamén subcampión no cadro de dobres facendo parella con Radulov, ao ser superados na final disputada o sábado polos españois Iván Marrero e Rafa Izquierdo.
