A decisión da empresa Supera de pechar por completo o Complexo Deportivo Rías do Sur a partir do próximo venres 1 de abril tivo como resposta este mércores unha nova concentración de protesta.
Nesta ocasión os clubs deportivos afectados polo peche decidiron mostrar o seu enfado coa decisión no centro da cidade, en lugar de facelo como hai uns días ás portas da propia instalación de Ponte Muíños.
Así, e durante espazo dunha hora, protagonizaron unha ruidosa concentración ante o ximnasio 24 horas que a empresa ten na céntrica rúa Blanco Porto.
Portando de novo o lema #LaOlímpicaNoSeCierra, os deportistas, familiares e usuarios asistentes quixeron deixar claro que seguirán loitando por conseguir que Rías do Sur recupere canto antes a súa actividade normal.