AROSA 1-2 UD BARBADÁS
Tras dous partidos consecutivos como local disputados no campo municipal Manuel Jiménez, o Arosa regresou este domingo á Lomba para medirse á UD Barbadás nunha xornada de portas abertas na que a entrada foi gratuíta tanto para socios como para non socios.
Buscaba o club que houbese gran ambiente na bancada que levase ao seu equipo cara ao triunfo, pero en lugar diso atopouse cunha nova derrota que o afasta da zona de play-off.
O equipo arlequinado, que non coñece a vitoria na Lomba desde o mes de novembro, chegou á cita minguado polas baixas de Tapha e Pacheco por lesión, e Dani e Samu por sanción, non puido superar a un Barbadás que, a pesar de ser o segundo peor visitante da categoría, mostrouse moi efectivo.
Os ourensáns adiantáronse no minuto 8 cun gol de Fernando Iglesias, e Joao ampliou a vantaxe no minuto 32.
Na segunda parte, o Arosa tentou reaccionar e logrou recortar distancias cun gol de Hugo Villaverde no minuto 60, tras un erro garrafal da defensa visitante nun centro lateral. Con todo, o tanto local non foi suficiente para remontar o partido, a pesar de que Compa tivo unha clara ocasión para empatar.
A afección local mostrou o seu descontento co resultado e o xogo do equipo, que volve perder en casa e afástase dos seus obxectivos.
Consulta a acta neste enlace
UD OURENSE 2-0 VILLALONGA
O equipo celeste cedeu no Couto ante un efectivo líder que encadea a súa quinta vitoria seguida sen encaixar e mete directa cara ao título e o ascenso directo.
Os visitantes deron unha boa imaxe, pero unha perda de balón en campo propio ante a presión rival valeulle á UDO para adiantarse. Parri recuperou ao bordo da área e axustou o balón ao pau, onde non puido chegar Rodri.
Pero os de Mariano non viñeron abaixo e pasaron a dominar, pero faltoulles claridade á hora de definir e apenas inquietaron ao equipo local.
Despois do descanso o líder fíxose co balón e, tras tres boas ocasións para sentenciar, fíxoo á hora de xogo. Rodri salvou a primeira, pero Osián aproveitou o rexeite para facer o 2-0 definitivo.
Consulta a acta neste enlace