Novo cambio no banco do Arosa, que xoga a súa última baza para tentar pelexar polo ascenso de categoría vía play-off.
O conxunto arlequinado confirmou este mércores a contratación de José Luís Lemos como o seu novo adestrador até final de tempada.
Lemos dirixirá este xoves o seu primeiro adestramento, relevando no cargo a David López 'Perú', solución interina tras a destitución de Míchel Alonso.
Despois de seis partidos con Perú ao mando (tres triunfos, dúas derrotas e un empate), e co equipo en sexta posición a dous puntos dos postos de fase de ascenso, a directiva decidiu finalmente buscar un revulsivo.
Faino confiando en todo un veterano dos bancos galegos, e con experiencia en lograr ascensos a Segunda B e Segunda RFEF, como o conseguido na súa última etapa no Bergantiños.
Antes pasou como adestrador por equipos como o Montañeros CF, Cidade de Santiago, Laracha, As Pontes, CCD Cerceda e CD Boiro, co que tamén conseguiu o salto de categoría.
Tras confirmar a noticia o Arosa quixo agradecer a Perú "o seu esforzo, compromiso, profesionalidade e, sobre todo, arosismo".
A estrea de Lemos no banco da Lomba producirase este próximo domingo 30 de marzo no duelo de rivalidade comarcal contra o Villalonga (18.00 horas).