Grandes sensacións para Antía Jácome na súa segunda xornada de competición nos Xogos Olímpicos de París.
A deportista pontevedresa, tras estrearse no C-2 500 con María Corbera clasificándose directamente para as semifinais desta categoría, repetiu este xoves na proba individual, o C-1 200.
Co seu segundo posto nas series clasificatorias Jácome aforra o esforzo de remar nos cuartos de final, e segue aspirando ao máximo en ambas as dúas probas.
A canadense Sophia Jensen impúxose na quenda cun tempo de 46.80 segundos, con Antía á súa zaga marcando un rexistro de 47.35 e deixándose levar nas paladas finais.
Cumprido o trámite, este venres chegará a pelexa polas medallas no C-2 500, coas semifinais previstas para as 10.30 horas e a final programada ás 12.50 horas. No que respecta a a canoa individual decidirase o sábado (11.40 horas as semifinais e 13.50 a final).