O Comité Técnico de Árbitros designou a Alejandro Hernández Hernández como árbitro principal para o encontro de dezaseisavos de final da Copa do Rei entre o Pontevedra CF e o RCD Mallorca, que se disputará hoxe venres ás 19:00 horas no estadio municipal de Pasarón.
O colexiado canario, que pisará por primeira vez o céspede pontevedrés, conta cunha dilatada experiencia no fútbol de elite.
Natural de Lanzarote, onde naceu en 1982, Hernández Hernández debutou en Primeira División na tempada 2012-2013, tras cinco anos dirixindo encontros na categoría de prata.
A súa traxectoria inclúe a dirección de importantes competicións internacionais como a Champions League, Europa League, Nations League e partidos clasificatorios para Mundiais e Eurocopas, participando na sala VAR na Eurocopa de Alemaña.
No ámbito nacional, un dos seus momentos máis destacados foi a final da Copa do Rei de 2022 entre o Betis e o Valencia, que se resolveu na tanda de penaltis a favor do conxunto sevillano tras o empate (1-1) no tempo regulamentario.
Nos seus 225 partidos dirixidos en Primeira División, Hernández Hernández amosou 1.283 tarxetas amarelas e 27 vermellas directas, ademais de sinalar 78 penaltis.
O seu labor foi recoñecido en 2015 co Trofeo Guruceta, que o acreditou como o mellor árbitro da tempada.