O ultimato da RFEF aos clubs de Primeira Federación para que votasen a favor dun sistema de control económico e outros cambios nas normas que regulan a competición recibiu unha resposta negativa de, polo menos, 16 dos conxuntos que compoñen a categoría, que se mostran a favor dalgunhas das propostas da Federación, pero non de toda a proposta.
A pesar da ameaza do organismo que preside Luís Rubiales, de recuperar o vello modelo de Segunda B se a resposta maioritaria non era favorable, os dirixentes destes conxuntos esixen máis tempo e unha negociación colectiva para decidir o futuro da categoría e acordar entre todos os implicados o modelo de xestión máis beneficioso.
Estes clubs están de acordo en que debe existir un control económico na categoría de bronce para que evitar o endebedamento, aínda que o seu voto favorable non será a cegas e piden coñecer a fondo o modelo e formar parte da súa redacción. Con todo, rexeitan a imposición da RFEF de ser axente activo na negociación do convenio colectivo específico para a categoría, algo que corresponde aos traballadores (sindicato de futbolistas) e á patronal. Tampouco están dacordo con que sexa o ente federativo o que regule a firma de acordos comerciais entre entidades deportivas.
Por todo isto, piden á RFEF que deixe sen efecto a votación da proposta remitida hai dous días aos clubs da Primeira Federación e que convoque ás entidades deportivas implicadas neste proceso a unha reunión cos representantes dos órganos directivos da Federación para, entre todos, acordar a implementación do modelo que se pretende.
Os 16 equipos que asinaron esta carta son Linares, San Fernando, Numancia, Eldense, Linense, Unionistas, SD Logroñés, A Nucía, Raio Majadahonda, Gimnástic de Tarragona, Mérida, Osasuna Promesas, UD Sanse, Real Unión, CF Talavera e UE Cornellà. Con todo, nas últimas horas uníronse máis clubs a estas demandas.