Xogando a que non se xogue. Esa foi a proposta dun Izarra que veu exclusivamente a defenderse, pero atopouse cun Pontevedra serio e eficaz, que ademais tivo paciencia ata conseguir derrubar o muro navarro. Os granates non deron opción a un rival que nin cando se viu co marcador en contra abriu liñas, e mesmo mereceu algún gol máis, nunha vitoria traballada e merecida
Dous non se pelexan se un non quere. O Izarra non quixo e o Pontevedra sufriu para abrir a lata. Porque os visitantes saíron a xustificar o seu ben gañada fama de equipo rochoso, complicado de bater. Cunha proposta netamente defensiva que lles levou non xa a defender con todo, senón tamén a non mirar sequera a área rival, que non chegaron a pisar en todo o partido.
Con dúas liñas defensivas moi xuntas, dispostos nun 5-4-1 que deixaba como unha illa ao seu home punta, Isaac, para ver se el só conseguía o milagre de inquietar a Edu, o Izarra afanábase en tapar todas as vías que conducían ata Aitor, plantexando un partido feo no futbolístico, pero práctico na súa execución. Agarrados á posibilidade dunha contra illada ou un erro local que non se produciu, os visitantes lograron a medias o seu obxectivo ata ben preto do descanso, que non era outro que o Pontevedra apenas dispuxese de ocasións de perigo.
Os granates comezaron ben, chegando especialmente pola banda dun activo David Añón, pero sen lograr superar case nunca as axudas defensivas da nutrida zaga visitante. Un par de centros laterais que rematou con escasas posibilidades Mario Barco e pouco máis, a pesar de facerse donos do balón case en exclusiva.
Pero os de Luisito caeron no erro de querer chegar demasiado pronto, pola vía máis curta, con envíos directos que non creaban problemas á defensa rival. E cando tentaban combinar, o oficio navarro e a permisividade arbitral co xogo subterráneo e esas "patadiñas" ao nocello do xogador que tentaba mover o balón, encargábanse de que os minutos fosen pasando sen novidades.
Estaba claro que había que madurar o partido e ao contrario, sen cometer erros defensivos. Iso fíxoo ben o equipo local, que nos minutos previos ao descanso empezou a xogar con máis paciencia ata obter froito nunha acción a balón parado, xusto cando o reloxo pasara xa o tempo do primeiro período. O Izarra cedeu un saque de esquina que lanzado por Bonilla foi rematado por Capi no segundo pau, mandando o balón ao poste. O rexeite foi para Portela, que desde preto marcaba e facía saltar o cerroxazo.
Tocaba mover ficha ao Izarra. Fíxoo o seu técnico tras o descanso, pero pronto se viu que as dúas substitucións realizadas eran un simple "cambio de cromos" sen ningún tipo de variación táctica. Jacobo Trigo tirou de galóns no centro do campo e o Pontevedra incrementou o seu dominio, que chegou a ser abafador sen atopar resposta visitante.
Precisamente Jacobo Trigo puxo un excelente balón na cabeza de Mouriño (minuto 51), pero o remate foise arriba. Logo probaría David Añón, desviado.
Os granates chamaban á porta do gol cada vez con máis insistencia e atoparon o premio ao seu esforzo nunha gran xogada que nace nun perfecto control orientado de Álex González que gaña a liña de fondo e pon un centro perfecto para que Mario Barco anticípese de cabeza, logrando o segundo e a sentenza.
Nin con todo perdido o Izarra foi ambicioso. Tampouco mostrou o máis mínimo perigo, terminando o partido sen disparar a porta. Incluso o Pontevedra, que mereceu máis goles, puido facer o terceiro nos últimos minutos, cando Álex González rematou de cabeza de preto, pero respondeu o porteiro visitante Aitor, mandando o balón a corner.
PONTEVEDRA CF (2): Edu; Miguel, Portela, Capi, Bonilla; Portela, Kevin Presa; David Añón, Mouriño (Abel, minuto 67), Jacobo (Álex González, minuto 73); e Mario Barco (Mateu, minuto 81).
CD IZARRA (0): Aitor; Eneko, Josetxo, Cabrera, Polaco, Cacho; Bruno (Joan, minuto 70), Sam, Briñol, Vilas (Deivid, minuto 46); e Isaac (Pito, minuto 46).
Árbitro: Fernando Román Román (Castela-León), auxiliado nas bandas por Rubén Díez Díez e Enrique Monge del Dujo. Amoestou a Capi, polo Pontevedra, e a Deivid, Briñol e ao adestrador Borja Jiménez, polo Izarra.
Goles: (1-0) Minuto 45: Portela. (2-0) Minuto 74: Mario Barco.
Incidencias: Estadio Municipal de Pasarón (Pontevedra). Uns 2.000 espectadores.