A Federación Internacional de Tríatlon (World Triathlon) confirmou este luns cales serán as datas denifitivas do que será o maior evento deportivo organizado nunca en Pontevedra, a Gran Final das Series Mundiais 2023.
O gran evento do tríatlon olímpico mundial celebrarase finalmente entre os días 20 e 24 de setembro do próximo ano.
Cabe destacar que na cita, ademais de decidirse os campións do Mundo elite, disputaranse os mundiais Sub-23, de Paratriatlón e de Grupos de Idade, tanto en distancia supersprint como estándar, e tamén o Campionato do Mundo de Aquabike por Grupos de Idade.
"Estamos a falar duns 5.000 deportistas e de máis de 10.000 persoas que se van a achegar a Pontevedra", confirmou recentemente o alcalde da cidade, Miguel Anxo Fernández Lores, na constitución do comité organizador.
A Gran Final das Series Mundiais é a competición estrela da World Triathlon, disputándose previamente en cidades como Londres, Budapest, Beijing, Auckland, Chicago, Gold Coast, Lausanne e Edmonton, nómina á que se sumará este ano 2022 Abu Dhabi.
Aínda que o calendario completo para eses días, do 20 ao 24 de setembro, darase a coñecer proximamente segundo anuncia a Federación, os preparativos para a cita levan a cabo a pleno rendemento, especialmente tras a celebración da recente proba da Copa do Mundo que serviu para testar tanto o circuíto que se usará en 2023 como aspectos relacionados coa organización.