Un ano máis, Campelo acollerá en maio unha das carreiras populares máis emblemáticas de Poio.Trátase da Maratón de Fátima, que neste 2023 chega á súa trixésima cuarta edición, sendo unha das máis antigas da bisbarra.
A cita terá lugar o sábado 13 de maio e está organizada pola Asociación de Veciños de Campelo, en colaboración co Concello de Poio e Cronotec. O alcalde, Luciano Sobral e a edil de Deportes, a nacionalista Marga Caldas, acompañada por integrantes da nova directiva do colectivo local, encabezada por Manuel Ligero deu a coñecer os pormenores da competición, que incluirá varias categorías e cuxa inscrición é gratuíta.
As anotacións poderán facerse na páxina web de cronotec e o período estará aberto ata as 23 horas do mércores 10 de maio.
Tamén estiveron presentes representantes de diferentes clubs e colectivos locais, ademais de dirixentes do SEK- Atlántico e do Motoclub A Rosa dos Ventos, que colaborarán no desenvolvemento das probas.
Este ano, unha das principais novidades ten que ver co percorrido da proba absoluta, xa que amplía a súa distancia con respecto a edicións anteriores, pasando a ser de 7,5 quilómetros. O circuíto parte desde a Praza da Granxa de Campelo, onde tamén estará habilitada a liña de meta, e servirá para percorrer diferentes partes da localidade pertencente á parroquia de San Xoán.
Á marxe da carreira absoluta, tamén haberá outros oito grupos para os máis cativos e cativas, en función da idade. Así, haberá unha proba ‘biberón’ para menores de 6 anos, sen carácter competitivo. Os sub-8 (nados entre 2016 e 2017) percorrerán unha distancia de 400 metros, mentres que os sub-10 (anos 2014- 2015) cubrirán 800 metros. Esta tamén será a lonxitude para os nenos e nenas que se apunten nas carreiras sub-12 e sub-14 (nados entre 2012 e 2013 e entre 2010 e 2011, respectivamente). Por último, para a proba sub-16 (nados entre os anos 2008 e 2009) habilítase un percorrido algo máis extenso, de 1.200 metros.
As probas de menores darán comezo desde as 17.00 horas, mentres que a absoluta será ás 17.45 horas. En todas elas haberá tanto categoría masculina como feminina. Os tres primeiros clasificados e clasificadas serán obsequiados cun trofeo. Ademais, tamén se repartirán medallas entre os e as participantes. Haberá un avituallamento sólido e líquido á finalización da proba, ao tempo que se habilitará servizo de duchas por parte da organización.
A concelleira de Deportes e os responsables da Asociación de Veciños de Campelo fan un chamamento á cidadanía para que tome parte na que “sen lugar a dúbidas volverá ser unha gran xornada de convivencia, saúde e deporte en Campelo”, ao tempo que salientan que actualmente as inscricións avanzan “a bo ritmo”. Ademais, o domingo 14 de maio, desde as 10.30 horas, tamén terá lugar unha andaina, con inscrición gratuíta desde media hora antes do seu inicio.