A Copa 5x5 de balonmán na rúa está a ser todo un "éxito", tal e como recoñeceu o presidente da Deputación de Pontevedra, Luis López, durante a súa visita á pista móbil situada na Praza de España.
Nela están a competir un gran número de equipos mixtos das categorías alevín (mozos e mozas nacidos nos anos 2012 e 2013) e benjamín (2014-2015), que desde o 2 de xullo monopolizaron a zona para achegar este deporte a todo o público de todas as idades.
A competición alongarase ata este domingo 7 de xullo e, aínda que é un proxecto piloto na provincia de Pontevedra, "vai ter continuidade o vindeiro ano", asegurou López. "Hai rapaces de diferentes clubs, moitos nunca tiveron contacto con balónman. Somos a casa do deporte, estamos a apostar moitísimo por el e aquí temos a mostra", manifestou.
Aproveitando a súa visita á pista móbil, o presidente da Deputación, xunto ao vicepresidente Rafa Domínguez, animouse a demostrar as súas habilidades neste deporte e pasar un intre agradable cos nenos e nenas participantes.