O Concello de Pontevedra pechou o prazo de presentación de solicitudes para percibir as subvencións deportivas do pasado ano 2019.
Esta convocatoria, xunto ás anteriores resoltas ao longo dos últimos meses, permitirán poñer ao Concello quedar só pendente de convocar as axudas de 2020.
"Neste primeiro ano de mandato entre axudas anuais para as Escolas Deportivas Municipais e subvencións nominais, mobilizamos 1,3 millóns de euros para os clubs da cidade", explica o concelleiro Tino Fernández.
Aos 900.000 euros das subvencións anuais hai que sumarlles o pago das EDM do período 2018-2019 (142.000 euros) e a apertura do procedemento para abonar as de 2019-2020 (250.000 euros). Ademais introduciuse unha cláusula Covid-19: pagaranse integramente a pesar de que non se están desenvolvendo desde marzo.
En canto á convocatoria aberta agora para fomentar a práctica deportiva e a participación en competicións oficiais na anualidade 2019, o goberno local recibiu a solicitude de 67 entidades do municipio.
Fernández sinalou respecto diso que o Servizo Municipal de Deportes "está a facer un importante esforzo para axilizar os trámites administrativos o máximo posible, co obxectivo de que os clubs poidan cobrar as axudas concedidas, unha vez xustificadas, antes de final de ano".
As subvencións de 2019 son as primeiras que se tramitan coa nova aplicación informática posta en servizo para tentar axilizar e sintetizar as xestións dos clubs.
A elas sumáronse este ano varias subvencións nominais, con case 12.000 euros á Sociedad Gimnástica (polo medio maratón), ao Mace Sport (polo Open Internacional Ciudad de Pontevedra de taekwondo) e o CN Galaico (programa de promoción da natación). Outros 8.000 euros foron para os Campionatos Nacionais de Piragüismo.