O Festival SonRías Baixas, que este ano celebra a súa XVI edición enchendo Bueu de novo nos días 2, 3 e 4 de agosto, suma sete novas bandas ao seu cartel.
Os rockeiros Berri Txarrak chegan a Bueu precedidos polo espectacular concerto que ofreceron no BEC ante máis de 10.000 persoas.
Reivindicativos e loitadores chegan os Gatillazo, grupo que Evaristo Páramos mantén máis vivo ca nunca co espírito de 'La Polla Records'. Cancións libertarias e cheas de humor como armas ante a inxustiza e a estupidez.
O SonRías Baixas completa a súa exitosa fórmula de directos potentes e enerxéticos coa banda Muchachito, que chega a Bueu para ofrecer a súa mestura de rumba, swing, funk e alegría, e cos que Che Sudaka funden o folclore latinoamericano cos ritmos xamaicanos e unha actitude punk.
Completan a aposta festivaleira as bandas Muerdo, Revolta Permanente e Assekes.
Estas sete bandas súmanse as xa anunciadas como son Desakato, Sara Hebe, Terbutalina e The Skarnivals.
As entradas están á venda na web sonriasbaixas.info cun prezo especial e limitado de 35 euros máis gastos os tres días de concerto, incluíndo a acampada.