O Museo de Pontevedra acolle desde este venres a exposición 'Sociedad Coral Polifónica de Pontevedra 1925-2025, cen anos de música coral en Galicia', unha mostra que percorre o século de vida desta emblemática institución cultural galega.
A exposición, comisariada por Xosé Carlos Valle Pérez, actual presidente da Polifónica, estrutúrase en catro espazos que amosan a evolución desta agrupación nacida co propósito de contribuír á construción da cultura galega a través da música.
Nas tres primeiras salas, os visitantes teñen por diante o percorrido cronolóxico polas diferentes etapas da coral.
A mostra inclúe fotografías que documentan os momentos previos á constitución formal da sociedade, así como imaxes de actuacións e retratos dos seus directores ao longo da historia.
Entre os documentos expostos destacan programas de man, recortes de prensa, partituras manuscritas de obras compostas por membros da coral, como "Si vas a San Benitiño" de Antonio Blanco Porto, "Canto d'Ourense" de Obdulia Prieto ou "Keltia" de Antonio Iglesias Vilarelle, ademais das primeiras gravacións realizadas pola agrupación na década de 1920.
Un dos maiores atractivos da exposición atópase na cuarta sala, onde se exhiben reproducións en gran formato de cinco dos dez panos de escena que Castelao realizou para a Sociedad Polifónica entre 1926 e 1934: Pórtico románico, Rosetón oxival, Interior de igrexa, Arco da vella e Capela oxival.
Estas escenografías, que chegan nalgúns casos aos 10 metros de longo e máis de 5 de alto, constitúen unha parte pouco coñecida da obra artística de Castelao, quen ademais de deseñar o logotipo da sociedade, presidiu a Polifónica entre 1929 e 1932.
A exposición complétase cun vídeo no que Ángeles Tilve, Carlos Valle e o pintor Rafael Úbeda explican interesantes detalles sobre o proceso de creación, aparición pública e restauración destes panos.
A mostra inclúe tamén retratos ao carbón realizados por Laxeiro de tres figuras fundamentais no nacemento da agrupación: Antón Losada Diéguez, Antonio Blanco Porto (primeiro director) e Antonio Iglesias Vilarelle (segundo director), así como un autorretrato do propio Castelao.
Durante a inauguración, a Polifónica ofreceu unha pequena actuación interpretando tres temas do seu repertorio, demostrando a "boa saúde" da que goza a agrupación no seu centenario.
Rafa Domínguez, vicepresidente da Deputación, destacou durante o acto o feito de que coincidan neste 2025 a celebración do centenario da Coral e o Ano Castelao, "xa que non podemos esquecer que o intelectual foi un dos seus presidentes, un dos seus integrantes e para a sociedad elaborou uns panos cuxas réplicas forman parte da mostra que acolle o Museo de Pontevedra".
A exposición permanecerá aberta ao público no Edificio Castelao do Museo de Pontevedra ata o domingo 20 de abril.
