Tres concertos integrarán a oferta musical da oitava edición do ciclo 'Achégate ao Salón', que se desenvolverá en Vilagarcía entre os meses de febreiro e abril. Serán, como é habitual, concertos os domingos pola mañá, a partir das 12:30 horas, no Salón García.
Os artistas invitados serán Quique González & Toni Brunet, Tulsa e Escuchando Elefantes.
O alcalde de Vilagarcía, Alberto Varela, explicou durante a presentación deste ciclo "totalmente asentado" que con este evento "buscamos crear unha proposta alternativa, que saia do habitual, fóra da tempada de verán e levando a música a outros espazos".
Quique González será o encargado de abrir o ciclo cun concerto o 16 de febreiro. Trátase dunha cita que haberá que marcar en vermello no calendario, xa que supón o regreso aos escenarios do artista madrileño que conta con milleiros de fans.
Farao en compañía do produtor e guitarrista, Toni Brunet, colaborador habitual tamén de Coque Malla, Miguel Ríos ou Andrés Suárez, co que González repasará os seus grandes éxitos.

O 23 de marzo será a quenda de Tulsa, o grupo capitaneado por Miren Iza, artista que vén de gañar o Premio Nacional de Músicas Actuales 2024 que concede o Ministerio de Cultura e Deporte polo seu álbum Amadora.
O ciclo pechará o 6 de abril con Escuchando Elefantes, un grupo de orixe galega formado por Carlos Tajes e Silvia Rábade no 2012, un dúo que aposta pola música de autor, implicándose en todo o proceso creativo, dende a composición ata a gravación dos videoclips.
Os abonos para o ciclo musical están á venda en Ataquilla.com ata o 10 de febreiro. O prezo é de 25 euros para o público xeral e de 15 euros para menores de 16 anos e desempregados.
A partir do 11 de febreiro sairán á venda as entradas individuais, cun prezo de 12 euros para todos os públicos e 6 euros no caso das bonificadas. Tamén se poderán mercar o mesmo día do concerto no Salón García, sempre e cando non se esgotasen na venda online.