Desde a súa inauguración na tarde do pasado venres, o Salón do Libro Infantil e Xuvenil de Pontevedra non parou de recibir visitantes ata pasar a cifra de 5.000 durante toda a fin de semana.
Durante os tres primeiros días de actividades pasaron polo Pazo da Cultura familias de diversas zonas de Galicia como Cambados, O Porriño, Ourense, Vigo, Noia, Redondela ou Catoira, segundo sinalan desde a organización, que ten rexistrada mesmo a visita dun grupo alemán que se atopa na cidade de vacacións.
Nos datos obtidos ata o momento destaca ademais o número de pais e nais que acoden por primeira vez ao Salón cos seus fillos.
Estes números continuarán crecendo durante a próxima semana, na que está prevista a visita de 4.000 escolares dos 12.000 en total que visitarán o Salón do Libro ata o 23 de abril.
Xa o pasado venres, durante o primeiro día de actividade, pasarón polo Pazo da Cultura 800 escolares de Bueu, O Grove, Cangas ou Cambados, ao que se uniron integrantes do Centro de Atención Integral Princesa Letizia (Vilagarcía) e da asociación Amencer- ASPACE de Pontevedra.
Durante as mañás, nos próximos días, está previsto realizar cinco contacontos e seis talleres para o alumnado infantil e de primaria dos centros colaboradores, 45 en total, que participaron no Salón realizando un traballo nas aulas.