O Museo de Pontevedra organiza un ano máis un obradoiro infantil con motivo da celebración da Feira Franca. Nesta ocasión, os nenos participantes descubrirán un aspecto da Idade Media europea que probablemente descoñezan: a popularidade que tiveron o que hoxe coñecemos como xogos de mesa.
No obradoiro 'Os números da fortuna' falarase dos distintos xogos e a diversidade dos taboleiros, e ademais os participantes crearán o seu propio taboleiro para xogar a 'A casa da fortuna' (Glückhaus), un xogo de azar alemán moi popular na Baixa Idade Media e na Época Moderna.
A actividade terá lugar no Edificio Castelao os días 29, 30 e 31 de agosto e mais o 1 de setembro de 11:00 a 13:00 horas, en catro sesións independentes, e está dirixida a nenos entre os 6 e os 12 anos.
A inscrición pode facerse a partir deste martes 22 de agosto ás 9:00 horas e ata o luns 28 de agosto ás 14:00 horas a través do correo electrónico reservas.museo@depo.gal, indicando nome, idade e número de teléfono de contacto.